ირაკლი ქადაგიშვილი: იმ ყურძნის წილი, რომელიც სათანადო კონდიციამდე არ არის მიყვანილი, უნდა შევამცირებინოთ. უნდა დავაჯეროთ მევენახე, რომ ჯობია, მან შედარებით მცირე რაოდენობით მოიყვანოს მოსავალი, რადგან ფინანსურად უფრო მოგებული დარჩება

იმ ყურძნის წილი, რომელიც სათანადო კონდიციამდე არ არის მიყვანილი, უნდა შევამცირებინოთ. უნდა დავაჯეროთ მევენახე, რომ ჯობია, მან შედარებით მცირე რაოდენობით მოიყვანოს მოსავალი, რადგან ფინანსურად უფრო მოგებული დარჩება, - განაცხადა რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ, ირაკლი ქადაგიშვილმა გადაცემაში „ღია ეთერი“.

მან ისაუბრა, თუ რამდენად მნიშვნელოვანია, მევენახემ შედარებით მცირე რაოდენობის, მაგრამ ხარისხიანი ყურძენი მოიყვანოს.

„ჩვენ ყველას ერთი პასუხისმგებლობა გვაქვს. რაღაც კარგია, რაღაც - ცუდი, სულ ყველაფერი იდეალურად რომ იყოს, აქ შეკრებილები არ ვიქნებოდით! ამიტომ, ჩვენი პასუხისმგებლობაა, რომ იმ მევენახესთან, რომელსაც ყველაზე მეტად უჭირს - მარტოა დარჩენილი, ჩვენ ყველამ ერთად უნდა ვიმოქმედოთ. სახელმწიფომ თავისი წილი პასუხისმგებლობა აიღოს; იმ ადამიანებს, ვისაც თავისი მაგალითით გავლენა გვაქვს ადგილზე, მაქსიმალური გავაკეთოთ, რომ ის ყურძენი, რომელიც თქვენც კარგად იცით, არ არის სათანადოდ მოვლილი და სათანადო კონდიციამდე მიყვანილი, ეს წილი შევამცირებინოთ. დავაჯეროთ ის მევენახე, რომ ჯობია, მან შედარებით მცირე რაოდენობით მოიყვანოს მოსავალი, რადგან საბოლოო ჯამში, ფინანსურად უფრო მოგებული დარჩება. ეს ჩვენ ყველას ერთობლივი სამუშაო გვაქვს, ვისაც მართლაც ამ საკითხზე გული შეგვტკივა“, - აღნიშნა ქადაგიშვილმა.