აჭარის მთავრობის თავმჯდომარე ზურაბ პატარაძე საფეხბურთო კლუბ ბათუმის „დინამოს“ ხელმძღვანელობას შეხვდა

აჭარის მთავრობის თავმჯდომარე, რეგიონის უმაღლესი საბჭოს თავმჯდომარე ცოტნე ანანიძესთან, საქართველოს პარლამენტის, ქალაქ ბათუმის მუნიციპალიტეტის და მთავრობის წარმომადგენლებთან ერთად, საფეხბურთო კლუბ ბათუმის „დინამოს“ ხელმძღვანელობას შეხვდა.

შეხვედრაზე აღინიშნა, რომ ბათუმში თანამედროვე ბავშვთა საფეხბურთო აკადემია და ახალი სავარჯიშო კომპლექსი გაიხსნება. ახალი სპორტული ბაზების შექმნა ბავშვებსა და ახალგაზრდებს ფეხბურთით დაინტერესებისა და პროფესიული განვითარების მეტ შესაძლებლობას მისცემს; შეხვედრაზე კლუბის სამომავლო ხედვა და დაგეგმილი პროექტები განიხილეს, რომლის ფარგლებშიც, საფეხბურთო ბაზაზე ბავშვთა საფეხბურთო აკადემია აშენდება, რომელიც სულ მცირე 600 აღსაზრდელისთვის იქნება განკუთვნილი. კომპლექსი გააერთიანებს სასწავლო და საცხოვრებელ კორპუსებს, სამედიცინო და სარეაბილიტაციო სივრცეებს, ორ დიდ და სამ მცირე ხელოვნურსაფარიან მოედანს, ასევე სპორტსმენებისა და მწვრთნელებისთვის საჭირო სხვა ობიექტებს. ფეხბურთელთა ფიზიკური მომზადებისთვის სპეციალიზებული დარბაზი და ექვსი ხელოვნურსაფარიანი მინიმოედანი გაკეთდება ლეონიძის ქუჩაზეც.

აჭარის მთავრობის თავმჯდომარემ ხაზი გაუსვა რეგიონში ქართული ფეხბურთის ტრადიციების შესაბამისად, ხელისუფლების მხრიდან ხელშემწყობ ღონისძიებებს და საფეხბურთო ინფრასტრუქტურის გაუმჯობესების მიზნით დაგეგმილ ღონისძიებებს. ახალი სპორტული ობიექტები, ბავშვთა და პროფესიული ფეხბურთის განვითარებასთან ერთად, აჭარაში სპორტული ტურიზმის შესაძლებლობების გაფართოებასაც შეუწყობს ხელს.

შეხვედრის შემდეგ მთავრობის თავმჯდომარე საფეხბურთო კლუბის წარმომადგენლებსაც შეხვდა და ბათუმის სტადიონზე ტყიბულის „მეშახტესთან“ გამართულ მატჩს დაესწრო, რომელიც ბათუმის „დინამოს“ გამარჯვებით დასრულდა.