ქალაქ ვალეში საშემოდგომო დღესასწაული „ვალეობა“ აღნიშნეს

ქალაქ ვალეში საშემოდგომო დღესასწაული „ვალეობა“ აღინიშნა.

ღონისძიება კულტურის სახლის მიმდებარედ გაიმართა, სადაც წარმოდგენილი იყო სხვადასხვა სახის კულტურული აქტივობები, საშემოდგომო კუთხეები, მესხური სამზარეულოსთვის დამახასიათებელი კერძები და კულინარიული შემოქმედება, ასევე ადგილობრივი ხელოვანების და ხალხური რეწვის ოსტატების ნამუშევრები.

ადგილობრივებს დღესასწაული მიულოცეს ახალციხისა და ტაო-კლარჯეთის მიტროპოლიტმა, მეუფე თეოდორემ, საქართველოს პარლამენტის დეპუტატმა ანტონ ობოლაშვილმა, ახალციხის მუნიციპალიტეტის მერმა ვარლამ წიკლაურმა და საკრებულოს თავმჯდომარე საბა კბილაშვილმა.

„ჩვენი ძალიან დიდი სურვილი იყო დღევანდელი დღე განსაკუთრებულად აღგვენიშნა და თქვენთვის დაუვიწყარი დღე გვეჩუქებინა. ჩვენ აქ გავაცოცხლეთ ვალეს გამორჩეული ისტორია, რომელიც ამ ქალაქს ჰქონდა და რითაც ძალიან ვამაყობთ. გილოცავთ და წარმატებებს გისურვებთ თითოეულ თქვენგანს!“, - აღნიშნა ვარლამ წიკლაურმა.

ღონისძიებას ადგილობრივი მოსახლეობა, სახელმწიფო რწმუნებულის ადმინისტრაციისა და ადგილობრივი თვითმმართველობის წარმომადგენლები ესწრებოდნენ.

„ვალეობის“ დღესასწაული გალა კონცერტით გაგრძელდა. მაყურებლის წინაშე ცნობილი ქართველი მომღერალი თამარ გვერდწითელი და ჯგუფი „თეატრალურის კვარტეტი“ წარსდგნენ. ღონისძიების ფარგლებში ასევე დაჯილდოვდნენ ღვაწლმოსილი და დამსახურებული ვალელები.

ტელეწამყვანმა ნიკოლოზ წულუკიძემ სპეციალურად მომზადებული ვიდეოკოლაჟი წარადგინა, სადაც ქალაქ ვალეს დაარსების, მისი განვითარებისა და აქ მცხოვრები ადამიანების ისტორიები იყო წარმოდგენილი.