ახალციხის მუნიციპალიტეტის მერმა ვარლამ წიკლაურმა სამშობლოსთვის თავდადებულ გმირთა მემორიალი ყვავილებით შეამკო

ახალციხეში აფხაზეთის ომში დაღუპული გმირები გაიხსენეს, - ინფორმაციას ახალციხის მუნიციპალიტეტის მერია ავრცელებს.

უწყების ცნობით, აღნიშნულ თარიღთან დაკავშირებით, ქალაქ ახალციხეში საქართველოს ტერიტორიული მთლიანობისთვის დაღუპული გმირების ხსოვნას პატივი მიაგეს.

„ახალციხის მუნიციპალიტეტის მერმა ვარლამ წიკლაურმა, სახელმწიფო რწმუნებულმა იოსებ ალიბეგაშვილმა, საკრებულოს თავმჯდომარემ საბა კბილაშვილმა, მოადგილეებთან, ვეტერანებთან, სამხედრო მოსამსახურეებთან, მხარის ადმინისტრაციის, ადგილობრივი თვითმმართველობისა და ქალაქის საზოგადოების წარმომადგენლებთან ერთად, ახალციხის ცენტრალურ პარკში სამშობლოსთვის თავდადებულ გმირთა მემორიალი ყვავილებით შეამკეს.

დაღუპულთა სულების მოსახსენებელი პანაშვიდი გადაიხადა მამა იოანე გელაშვილმა.

სოხუმის დაცემის დღესთან დაკავშირებით ახალციხის მუნიციპალიტეტში, ადმინისტრაციულ შენობებზე სახელმწიფო დროშები დაშვებულია“, - აღნიშნულია გავრცელებულ ინფორმაციაში.