აჭარის მთავრობის თავმჯდომარე გაეროს ტურიზმის ორგანიზაციის გენერალურ მდივანს შეხვდა

აჭარის ავტონომიური რესპუბლიკის მთავრობის თავმჯდომარე ზურაბ პატარაძე, გაეროს ტურიზმის ორგანიზაციის (UN Tourism) გენერალურ მდივანს, შაიხა ნასერ ალ ნუვაისს შეხვდა, - ინფორმაციას აჭარის მთავრობა ავრცელებს.

უწყების ცნობით, შეხვედრაზე ყურადღება გამახვილდა საერთაშორისო ტურისტულ ბაზრებზე აჭარის პოზიციონირების გაძლიერებაზე, რეგიონის კულტურული და ბუნებრივი მემკვიდრეობის პოპულარიზაციაზე, ტურისტული პროდუქტების დივერსიფიცირებასა და ტურისტული პოტენციალის კიდევ უფრო ეფექტიანად გამოყენებაზე.

„ზურაბ პატარაძემ გაეროს ტურიზმის ორგანიზაციის გენერალურ მდივანს აჭარის ტურიზმის სფეროში ბოლო წლებში განხორციელებული მნიშვნელოვანი პროექტები და რეგიონის ტურისტული შესაძლებლობები გააცნო.

შეხვედრის ერთ-ერთი მთავარი მიმართულება გაეროს ტურიზმის ორგანიზაციასა და აჭარის ავტონომიურ რესპუბლიკას შორის თანამშრომლობის გაღრმავება იყო. მხარეებმა სამომავლო ერთობლივი ინიციატივებისა და პროექტების განხორციელების შესაძლებლობებზე ისაუბრეს, მათ შორის, მდგრადი ტურიზმის განვითარების და საერთაშორისო გამოცდილების გაზიარების მიმართულებით.

გაეროს ტურიზმის ორგანიზაციის გენერალურმა მდივანმა ტურიზმის სფეროში მიღწეულ პროგრესს გაუსვა ხაზი და აღნიშნა საერთაშორისო თანამშრომლობის მნიშვნელობა ტურიზმის მდგრადი განვითარების ხელშეწყობისთვის.

შეხვედრას საქართველოს ეკონომიკისა და მდგრადი განვითარების მინისტრის მოადგილე ირაკლი ნადარეიშვილი, საქართველოს საგანგებო და სრულუფლებიანი ელჩი ესპანეთის სამეფოში ალექსანდრე ჭკუასელი, ტურიზმის ეროვნული ადმინისტრაციის ხელმძღვანელი მაია ომიაძე და აჭარის ფინანსთა და ეკონომიკის მინისტრი ედნარ ნატარიძე ესწრებოდნენ“, - აღნიშნულია გავრცელებულ ინფორმაციაში.