გიორგი ჯინჭარაძე რეზიდენტურის პროგრამის მონაწილე სტუდენტებს შეხვდა

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრ ბესიკ კუსიდისთან ერთად, რეზიდენტურის პროგრამის მონაწილე სტუდენტებს შეხვდა. ინფორმაციას აფხაზეთის მთავრობა ავრცელებს.

უწყების ცნობით, შეხვედრის მიზანი იყო ახალგაზრდა ექიმებთან დიალოგი და მათი პროფესიული განვითარების მხარდამჭერი საკითხების განხილვა.

„ჩვენთვის უმთავრესი პრიორიტეტია ჩვენი ახალგაზრდების პროფესიული წარმატება, რაც, რა თქმა უნდა, დაკავშირებულია ქვეყნისა და აფხაზეთის სახელთან.

პროგრამის ფარგლებში მუშაობა აქტიურად გაგრძელდება, რათა მომავალში კიდევ უფრო მეტმა ახალგაზრდამ შეძლოს აღნიშნული მხარდაჭერით სარგებლობა და საკუთარი კვალიფიკაციის ამაღლება“, - განაცხადა გიორგი ჯინჭარაძემ.

რეზიდენტურის დაფინანსების კომპონენტს აფხაზეთიდან იძულებით გადაადგილებული პირებისთვის აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრო უზრუნველყოფს და ბენეფიციარებისთვის სამედიცინო საქმიანობის უფლების მოპოვების ხელშეწყობას ისახავს მიზნად.

2026 წელს პროგრამით რეზიდენტურის 40-მდე სტუდენტის განაცხადი დაკმაყოფილდა.