ზურაბ პატარაძემ და გივი მიქანაძემ მახინჯაურის საჯარო სკოლის განახლებული ინფრასტრუქტურა დაათვალიერეს და მოსწავლეებსა და მასწავლებლებს სწავლის დაწყება მიულოცეს

აჭარის მთავრობის თავმჯდომარემ ზურაბ პატარაძემ, საქართველოს განათლების, მეცნიერებისა და ახალგაზრდობის მინისტრთან ერთად, ხელვაჩაურის მუნიციპალიტეტში დაბა მახინჯაურის საჯარო სკოლის ახლად აშენებული დამატებითი კორპუსი გახსნა.

ზურაბ პატარაძემ და გივი მიქანაძემ განახლებული სასკოლო ინფრასტრუქტურა დაათვალიერეს და მოსწავლეებსა და მასწავლებლებს თანამედროვე სტანდარტების შესაბამის გარემოში სწავლის დაწყება მიულოცეს.

სკოლის ინფრასტრუქტურას ასევე გაეცნენ განათლების, მეცნიერებისა და ახალგაზრდობის მინისტრის მოადგილე ზვიად გაბისონია, აჭარის განათლებისა და სპორტის მინისტრი მაია ხაჯიშვილი და ადგილობრივი ხელისუფლების წარმომადგენლები.

ინფრასტრუქტურული პროექტის ფარგლებში აშენდა 400 მოსწავლისთვის გათვალისწინებული სამსართულიანი შენობა, სადაც მოეწყო დახურული სპორტული დარბაზი. კორპუსი ადაპტირებულია შეზღუდული შესაძლებლობის მქონე პირებისთვის: დამონტაჟებულია ლიფტი, ადაპტირებული სანიტარული კვანძები და პანდუსი.

სამშენებლო სამუშაოები აჭარის განათლებისა და სპორტის სამინისტრომ ჩაატარა და პროექტის ღირებულება 2 500 000 ლარია.

სასკოლო ინფრასტრუქტურის განვითარების მიზნით, დაგეგმილია მახინჯაურის სკოლის ძველი შენობის დემონტაჟი და მეორე, ძირითადი კორპუსის მშენებლობა, სადაც საკლასო ოთახებთან ერთად იქნება - ბიბლიოთეკა, სააქტო დარბაზი, ლაბორატორიები და სხვა ფუნქციური სივრცეები.

აჭარის მთავრობისა და ადგილობრივი თვითმმართველობის წარმომადგენლებმა მოსწავლეებსა და პედაგოგებს თანამედროვე სტანდარტების შესაბამის გარემოში ახალი სასწავლო წლის დაწყება მიულოცეს და განახლებული სკოლის სივრცეები დაათვალიერეს.