ახალციხის მუნიციპალიტეტის მერი ვარლამ წიკლაური ქალაქის სხვადასხვა სკოლას ესტუმრა

ახალციხის მუნიციპალიტეტის მერი ვარლამ წიკლაური, სამცხე-ჯავახეთის სახელმწიფო რწმუნებულ იოსებ ალიბეგაშვილთან, საკრებულოს თავმჯდომარე საბა კბილაშვილთან, მერისა და სახელმწიფო რწმუნებულის მოადგილეებთან და საგანმანათლებლო რესურსცენტრის ხელმძღვანელ ხათუნა ხმალაძესთან ერთად, ქალაქის სხვადასხვა სკოლას ესტუმრა. ინფორმაციას ახალციხის მუნიციპალიტეტის მერია ავრცელებს.

უწყების ცნობით, ადგილობრივი თვითმმართველობისა და სახელმწიფო რწმუნებულის ადმინისტრაციის ხელმძღვანელმა პირებმა მოსწავლეებს, პედაგოგებსა და მშობლებს ახალი სასწავლო წლის დაწყება მიულოცეს, წარმატებები უსურვეს და მხარდაჭერას დაჰპირდნენ.

„ახალი სასწავლო წლის დაწყებას განსაკუთრებით ვულოცავთ ჩვენს პირველკლასელებს, რომლებმაც წელს პირველად შეაღეს სკოლის კარი. თითოეულ მოსწავლეს, პედაგოგსა თუ მშობელს წარმატებულ და ნაყოფიერ სასწავლო წელს გისურვებთ! ახალციხის მუნიციპალიტეტის მერიისთვის პრიორიტეტს წარმოადგენს საგანმანათლებლო სექტორის მხარდაჭერა, რაც ინფრასტრუქტურული თუ სხვა სახის პროექტების განხორციელებას ისახავს მიზნად. ჩვენ მზად ვართ მომავალშიც გავაგრძელოთ ამ მიმართულებით აქტიური მუშაობა“, - აღნიშნა ვარლამ წიკლაურმა.

მოსწავლეებს, მათ პედაგოგებს და მშობლებს ახალი სასწავლო წლის დაწყება ასევე მიულოცეს მერის მოადგილეებმა - ნოდარ ტატალიშვილმა, რუბენ კარაპეტიანმა და გიორგი მელიქიძემ, სახელმწიფო რწმუნებულის მოადგილეებმა - დავით მუმლაძემ და ვახტანგ მერაბიშვილმა.

წელს ახალციხის მუნიციპალიტეტის სკოლებში სწავლა 450 -მა პირველკლასელმა დაიწყო.