ხულოს მუნიციპალიტეტის მერი ვახტანგ ბერიძე დაბა ხულოსა და ბეღლეთის საჯარო სკოლებში იმყოფებოდა

ხულოს მუნიციპალიტეტის მერი ვახტანგ ბერიძე, აჭარის ავტონომიური რესპუბლიკის უმაღლესი საბჭოს წევრ მინურ პაქსაძესთან, საკრებულოს თავმჯდომარე რენარ ბოლქვაძესთან და ადგილობრივი თვითმმართველობის წარმომადგენლებთან ერთად, დაბა ხულოსა და ბეღლეთის საჯარო სკოლებში იმყოფებოდა. ინფორმაციას ხულოს მუნიციპალიტეტის მერია ავრცელებს.

უწყების ცნობით, მერმა სკოლის მოსწავლეებსა და პედაგოგებს ახალი სასწავლო წლის დაწყება მიულოცა და მათ წარმატებული და ნაყოფიერი სასწავლო წელი უსურვა.

„ვულოცავ ყველა მოსწავლეს, განსაკუთრებით კი პირველკლასელებს, ახალი სასწავლო წლის დაწყებას. განათლება ჩვენი მუნიციპალიტეტის ერთ-ერთი მნიშვნელოვანი პრიორიტეტია. ჩვენთვის მნიშვნელოვანია თითოეულ ბავშვს ჰქონდეს შესაძლებლობა, მიიღოს ხარისხიანი განათლება და ისწავლოს შესაბამის გარემოში. ვუსურვებ მოსწავლეებს წარმატებულ და ნაყოფიერ სასწავლო წელს, პედაგოგებს კი პროფესიულ წარმატებას. დარწმუნებული ვარ, ერთად შევძლებთ კიდევ უფრო მეტი შესაძლებლობის შექმნას ჩვენი ახალგაზრდებისთვის“, - განაცხადა ვახტანგ ბერიძემ

მიმდინარე წელს ხულოს მუნიციპალიტეტში სასკოლო განათლებას 110 პირველკლასელი იწყებს.

მუნიციპალიტეტში სასწავლო პროცესი ყველა საჯარო და კერძო სკოლაში დაიწყო.