გარდაბნის მუნიციპალიტეტის მერმა დავით კარგარეთელმა მოსწავლეებს, პედაგოგებსა და მშობლებს 2026-2027 სასწავლო წლის დაწყება მიულოცა

გარდაბნის მუნიციპალიტეტის მერმა დავით კარგარეთელმა მოსწავლეებს, პედაგოგებსა და მშობლებს 2026-2027 სასწავლო წლის დაწყება მიულოცა. ინფორმაციას გარდაბნის მუნიციპალიტეტის მერია ავრცელებს.

უწყების ცნობით, მუნიციპალიტეტის მერი, მოადგილე ფუად მირზოევთან, საკრებულოს თავმჯდომარე მიხეილ გედეხაურთან, საგანმანათლებლო რესურსცენტრის ხელმძღვანელ მაია ჩადუნელთან და ადგილობრივი ხელისუფლების სხვა წარმომადგენლებთან ერთად, ქალაქ გარდაბნის ლევან დევდარიანის სახელობის №1 და №3 საჯარო სკოლებს ესტუმრა.

დავით კარგარეთელმა მოსწავლეებს სიტყვით მიმართა, ახალი სასწავლო წლის დაწყება მიულოცა და წარმატებები უსურვა.

„გილოცავთ ახალი სასწავლო წლის დაწყებას! განსაკუთრებით ვულოცავ პირველკლასელებს, პედაგოგებსა და მშობლებს. განათლება ჩვენი მუნიციპალიტეტის ერთ-ერთი მთავარი პრიორიტეტია და მნიშვნელოვანია თითოეულ მოსწავლეს ჰქონდეს თანამედროვე და ღირსეული გარემო ცოდნის მისაღებად. ჩვენს მომავალ თაობას წარმატებულ, საინტერესო და ნაყოფიერ სასწავლო წელს ვუსურვებ“, - აღნიშნა მერმა.

2026–2027 სასწავლო წელს გარდაბნის მუნიციპალიტეტის საჯარო სკოლებში 950 პირველკლასელი ირიცხება.

სასწავლო წლის დაწყებასთან დაკავშირებით, გარდაბნის მუნიციპალიტეტი მერიის მუნიციპალური პროგრამების ფარგლებში, მუნიციპალიტეტში მცხოვრებ 320 ბენეფიციარს სასკოლო ნივთები გადაეცა.

დეტალური ინფორმაცია პროგრამის შესახებ იხილეთ ბმულზე.