ლევან მეხუზლა: ამ ეტაპისთვის, მთლიანად კახეთის მასშტაბს თუ ავიღებთ, 3 ათას ტონამდე ყურძენია დაკრეფილი და გადამუშავებული. ესენი ძირითადად ნაადრევი ჯიშებია

ამ ეტაპისთვის, მთლიანად კახეთის მასშტაბს თუ ავიღებთ, 3 ათას ტონამდე ყურძენია დაკრეფილი და გადამუშავებული - განაცხადა გადაცემაში „დღის ქრონიკა“ ღვინის ეროვნული სააგენტოს თავმჯდომარე ლევან მეხუზლამ.

ლევან მეხუზლას თქმით, ესენი ძირითადად ნაადრევი ჯიშებია.

„რა თქმა უნდა, რთველი განსაკუთრებით მნიშვნელოვანია საქართველოსთვის, განსაკუთრებით კახეთისთვის და აქედან გამომდინარე, ვფიქრობ ძალიან მნიშვნელოვანია, რომ მოსახლეობას შესაბამისი ინფორმაცია მივაწოდოთ.
ამ ეტაპისთვის, მთლიანად კახეთის მასშტაბს თუ ავიღებთ, 3 ათას ტონამდე ყურძენია დაკრეფილი და გადამუშავებული. ეს ძირითადად არის ნაადრევი ჯიშები, ფრანგული ჯიშები, რომლებიც ძირითადად ცქრიალა ღვინის დასამზადებლად გამოიყენება. ტექნოლოგიიდან გამომდინარე, მსგავსი ყურძენი შედარებით ნაკლებ შაქრიანი უნდა იყოს, ვინაიდან, შემდეგ უკვე ღვინის დამზადებისას მეორედ დუღილს გადის. ასევე, უკვე ტრადიციული რთველი დაიწყო დედოფლისწყაროში და პირველი მიმღები პუნქტი გაიხსნა სახელმწიფოს მხრიდან. მოგეხსენებათ, რომ ჩვენი ერთ-ერთი მთავარი მიზანი, ვალდებულება და ამოცანა არის, რომ ყურძენი აუცილებლად დაბინავდეს, არ დარჩეს გადაუმუშავებელი. შესაბამისად, ზედმეტ ყურძენს, რომელსაც არ გადაამუშავებს კერძო სექტორი, ჩაიბარებს სწორედ სახელმწიფო საწარმო. ამ ეტაპისთვის, გუშინ სახელმწიფო საწარმომ ჩაიბარა 30 ტონა ყურძენი და დღესაც გრძელდება ეს პროცესი დედოფლისწყაროს მუნიციპალიტეტში“, - აღნიშნა მან.

რაც შეეხება ფასებს, ლევან მეხუზლას თქმით, ყურძნის ფასი სახელმწიფოს ჩაბარების და ჩარევის შემთხვევაში მიება ხარისხს, ანუ შაქრიანობის მაჩვენებელს.

„საფერავის შემთხვევაში ზღვარი არის 21, რომლის ზევითაც ყურძენი ჩაბარდება ლარნახევრად, 17-დან 21-მდე ჩაბარდება 90 თეთრად. რაც შეეხება 17-ის ქვევით, ვფიქრობ, ეს ცალსახად ის მაჩვენებელია, რომლის ქვევითაც საქართველოში საღვინე ყურძენი არ უნდა იყოს და არ უნდა მოვიყვანოთ. ამიტომ, ამგვარი ყურძნისთვის საკმაოდ დაბალი ფასი, 30 თეთრი განისაზღვრა.

რაც შეეხება სხვა ჯიშებს, 17-ის ქვემოთ 30 თეთრია, 17-იდან 20-მდე არის 80 თეთრი და 20-ის ზევით 1,30“, - განაცხადა მან.