ექსპერტი შოთა თხელიძე: ჩინური ინტერესის შემოსვლა, გარკვეულწილად, უსაფრთხოების ბალიშს გვიქმნის, რომ არ აღმოვჩნდეთ საფრთხის ქვეშ როგორც ჩრდილოეთიდან, ასევე სამხრეთიდან

ჩინური ინტერესის შემოსვლა, გარკვეულწილად, უსაფრთხოების ბალიშს გვიქმნის, რომ არ აღმოვჩნდეთ საფრთხის ქვეშ როგორც ჩრდილოეთიდან, ასევე სამხრეთიდან, - განაცხადა „დღის ქრონიკაში“ საერთაშორისო ურთიერთობების ექსპერტმა შოთა თხელიძემ.

მისივე თქმით, დივერსიფიკაციის პოლიტიკა საქართველოსთვის დღის წესრიგში დადგა, უსაფრთხოების გამოწვევებიდან გამომდინარე.

„ერთგანზომილებიანი საგარეო პოლიტიკით, რომელსაც აქამდე ატარებდა საქართველო, ჩვენს უსაფრთხოებას გამოწვევები ექნებოდა არამხოლოდ უკრაინის კონფლიქტთან მიმართებით, არამედ დღეს უკვე ახლო აღმოსავლეთში მიმდინარე კონფლიქტთან დაკავშირებით.

რეალურად ჩვენ რეგიონში ირანის სახით ახალი გეოპოლიტიკური მოთამაშე გვყავს, რომელსაც აქტიური საგარეო პოლიტიკა აქვს. შეგახსენებთ ირანელი მაღალჩინოსნების განცხადებებს: მის ახლო-მახლო რეგიონში ქვეყნები, რომლებიც იქნებიან გამოყენებული ირანზე თავდასხმისთვის, ისინი ირანის მხრიდან თავდასხმის ობიექტი გახდებიან.

ამიტომ ეს გამოწვევები, რომელიც ჩვენ შეგვექმნა ბოლო წლების განმავლობაში როგორც ჩრდილოეთიდან, ასევე სამხრეთიდან, ამან გვაიძულა, რომ ანგარიში გაგვეწია ამ საერთაშორისო მოთამაშეების ინტერესებისთვის. ეს რომ არ გაგვეკეთებინა, ჩვენ ორმაგი უსაფრთხოების წნეხის ქვეშ ვიქნებოდით როგორც ჩრდილოეთიდან, ასევე სამხრეთიდან. ჩინური ინტერესის შემოსვლა, გარკვეულწილად, უსაფრთხოების ბალიშს გვიქმნის, რომ არ აღმოვჩნდეთ საფრთხის ქვეშ როგორც ჩრდილოეთიდან, ასევე სამხრეთიდან. ასე რომ, საკმაოდ რთული კონფიგურაცია დგება ჩვენ გარშემო, ტრანზიტული პერიოდი, სადაც ჯერჯერობით მყარი პოლიტიკა არ არსებობს“, - განაცხადა შოთა თხელიძემ.

მისივე თქმით, სანამ კონფლიქტები არ დასრულდება და ძალაუფლების ცენტრები არ გამოიკვეთება, იქამდე რთული იქნება საქართველომ გამოკვეთოს საგარეო პოლიტიკის ვექტორები.