არჩილ გორდულაძე საფრანგეთში უცხოურ ჩარევებთან დაკავშირებულ კანონპროექტზე: როგორც ნებისმიერ სუვერენულ ქვეყანას, მათაც აქვთ უფლება, რომ გარე ჩარევებისგან დაიცვან თავიანთი სახელმწიფო. როგორც ფრანგებს აქვთ ამის შესაძლებლობა, იგივე უფლება აქვს ჩვენს ქვეყანასაც

იურიდიულ საკითხთა საპარლამენტო კომიტეტის თავმჯდომარე არჩილ გორდულაძე ფრანგი სენატორების მიერ კომიტეტის დონეზე კანონპროექტის მხარდაჭერას აფასებს, რომელიც უცხოურ ჩარევებთან და გავლენებთან ბრძოლას ისახავს მიზნად.

„როგორც ნებისმიერ სუვერენულ ქვეყანას, მათაც აქვთ უფლება, რომ გარე ჩარევებისგან დაიცვან თავიანთი სახელმწიფო. როგორც ფრანგებს აქვთ ამის შესაძლებლობა, იგივე უფლება აქვს ჩვენს ქვეყანასაც. სტანდარტად არის დაწესებული უსტანდარტობა, რომ მათთვის რაღაც არის მისაღები, ხოლო საქართველოსთვის ეს არის ცის ჩამოქცევა და დემოკრატიული უკუსვლა. საზოგადოება ძალიან კარგად აფასებს, რომ მათთვის საჭირო რაც არის, იმას აკეთებენ, ხოლო ზუსტად იმავესთან დაკავშირებით ჩვენს წინააღმდეგ უსაფუძვლო თავდასხმებს ახორციელებენ, რაც რა თქმა უნდა, კატეგორიულად მიუღებელია”, - განაცხადა გორდულაძემ.

როგორც ცნობილია, ფრანგმა სენატორებმა აღნიშნულ კანონპროექტს კომიტეტის დონეზე მხარი დაუჭირეს. კანონპროექტი რამდენიმე მნიშვნელოვან ცვლილებას ითვალისწინებს, მათ შორის, დეზინფორმაციის გავრცელებაზე 3 წლამდე თავისუფლების აღკვეთასა და 45 000 ევროს ოდენობის ჯარიმას.