შალვა პაპუაშვილი: პარტიები, რომლებიც თანამშრომლობენ უცხო ძალებთან, სახელმწიფოებთან, სპეცსამსახურებთან და პარტიები, რომლებიც დაკავებულები არიან საქართველოს დაზიანებით, სამართლებრივი ცოდნაც არ სჭირდება, რათა ადამიანმა დაასკვნას, რომ ესენი არიან ანტიკონსტიტუციური პარტიები

პარტიები, რომლებიც თანამშრომლობენ უცხო ძალებთან, სახელმწიფოებთან, სპეცსამსახურებთან და პარტიები, რომლებიც დაკავებულები არიან საქართველოს დაზიანებით, ამას სამართლებრივი ცოდნაც არ სჭირდება იმისთვის, რომ ადამიანმა დაასკვნას, რომ ესენი არიან ანტიკონსტიტუციური პარტიები, - განაცხადა პარლამენტის თავმჯდომარემ, შალვა პაპუაშვილმა.

მისი თქმით, საბოლოო ჯამში, საკონსტიტუციო სასამართლო გადაწყვეტს, თუ რამდენად მყარი არგუმენტები აქვს „ქართულ ოცნებას“ კონკრეტული პარტიების წინააღმდეგ.

„თავდაცვითი დემოკრატიის კონცეფცია გულისხმობს, რომ სახელმწიფომ და დემოკრატიამ თავი დაიცვას ანტიდემოკრატიული ძალებისგან. სწორედ ამიტომ, საქართველოს კონსტიტუციაში 1995 წლიდან წერია, რომ პარტიები, რომლებიც ანტიკონსტიტუციურები არიან თავისი არსით, მათი ადგილი არ არის პარტიულ ლანდშაფტში. ასე რომ, ჩვენ, პარლამენტის წევრებმა, გამოვიყენეთ კონსტიტუციის მიერ ჩვენთვის მონიჭებული უფლება, მივმართეთ საკონსტიტუციო სასამართლოს. ვფიქრობთ, რომ ჩვენი სარჩელი არის ძალიან დასაბუთებული. ამას დიდი იურისტობა არ სჭირდება და ჩვენი საზოგადოება თვითონ ხედავს, რომ როდესაც ჩვენ საქმე გვაქვს პარტიებთან, რომლებიც წლებია ცდილობენ ძალადობრივ დამხობას ჩვენი ხელისუფლების, პარტიები, რომლებიც არ აღიარებენ არჩევნებს, როგორც ხელისუფლებაში მოსვლის პროცედურასა და ინსტრუმენტს, პარტიები, რომლებიც თანამშრომლობენ უცხო ძალებთან, სახელმწიფოებთან, სპეცსამსახურებთან და პარტიები, რომლებიც დაკავებულები არიან საქართველოს დაზიანებით, ცდილობენ, რომ სხვადასხვა სახელმწიფოები დაიყოლიონ სადამსჯელო ღონისძიებაზე - ამას სამართლებრივი ცოდნაც არ სჭირდება იმისთვის, რომ ადამიანმა დაასკვნას, რომ ესენი არიან ანტიკონსტიტუციური პარტიები. ამიტომ ჩვენ ველით საკონსტიტუციო განხილვებს და, საბოლოო ჯამში, საკონსტიტუციო სასამართლოს გადაწყვეტილება იქნება ის, თუ რამდენად მყარია ჩვენი არგუმენტები“, - განაცხადა პაპუაშვილმა.