„ეს ჩემთვის განსაკუთრებული გამოცდილებაა, კიდევ ერთხელ მახსენებს, რამდენად რთული სამუშაოა და რამდენად შრომისმოყვარე და გამბედავი ხალხი ხართ“ - დიპლომატები კახეთში რთველში მონაწილეობაზე

საქართველოში აკრედიტებული დიპლომატიური კორპუსის წარმომადგენლები კახეთში, რთველში მონაწილეობის მნიშვნელობაზე საუბრობენ.

„ძალიან ბედნიერი ვარ, რომ აქ ვარ და ვმონაწილეობ რთველში, რომელსაც ყოველ წელს ვმართავთ. ეს ჩემთვის განსაკუთრებული გამოცდილებაა, რადგან მახსოვს, ბავშვობაში ჩემს ქვეყანაშიც ვმონაწილეობდი. ეს კიდევ ერთხელ მახსენებს, რამდენად რთული სამუშაოა და რამდენად შრომისმოყვარე და გამბედავი ხალხი ხართ“, - განაცხადა წმინდა საყდრის სამოციქულო დესპანმა ანტე იოზიჩმა.

მედიასთან კომენტარი გააკეთა საქართველოში თურქეთის ელჩმა მუსტაფა თუექერ არიმ.

„საქართველო ძალიან ცნობილია ღვინის წარმოებითა და ექსპორტით. ეს ძალიან არაფორმალური შეხვედრაა და მნიშვნელოვანია, რომ ღვინის მწარმოებლებს გავესაუბროთ, გავიგოთ მათი გამოწვევები, როგორ აწარმოებენ ღვინოს, როგორ უვლიან ვენახს და რაც მთავარია, როგორ განსაზღვრავენ ყურძნის კრეფისთვის ზუსტად შესაფერის დროს", - განაცხადა თურქეთის ელჩმა.

საქართველოში იტალიის ელჩმა კი ორ ქვეყანას შორის გაავლო პარალელი.

„ჩვენ ქვეყნებს ბევრი რამ აერთიანებს, მსგავსი ბუნება, კულტურა და ტრადიციები. დღეს მართლა ძალიან კარგი დღეა, ამინდი შესანიშნავია და მიხარია, რომ მაქვს შესაძლებლობა, მონაწილეობა მივიღო საგარეო საქმეთა სამინისტროს მიერ ელჩებისთვის ორგანიზებულ ღონისძიებაში, სადაც ვეცნობით, როგორ მიმდინარეობს საქართველოშირთველისსეზონი“, - განაცხადა მასიმილიანო დ ანტუონომ.

საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა საქართველოში აკრედიტებული დიპლომატიური კორპუსის წარმომადგენლებს დღეს წინანდალში რთველში უმასპინძლა.