გურამ ნიკოლაშვილი: ყველა ხვდება, რომ აზრი აღარ აქვს და დამთავრდა ეს პროტესტი, ყველა ხვდება, რომ განწყობებზე ეს არ აისახა. გაჟონა IRI- ის კვლევამ, სადაც პრაქტიკულად მთელი სურათი რამდენიმე სლაიდში სრულად არის მოცემული. ხელისუფლების მხარდაჭერა არ დაკლებულა, ოპოზიციის მხარდაჭერა გაქრა

ის შიდა დისკუსია, რაც ოპოზიციაში წარიმართა, რომ ის ხალხი ბოლომდე უნდა იჯდეს ციხეში, ვინც არის პატიმრობაში და თუ უნდათ გამოვიდნენ, ამ საკითხმა შეიტანა დიდი განხეთქილება, - განაცხადა გადაცემაში „დღის ქრონიკა“ თბილისის საკრებულოს წევრმა გურამ ნიკოლაშვილმა.

მისივე თქმით, ის პროტესტი, რომელსაც გაცხადებულ მიზნად გააჩნია, რომ ეს არის პროტესტი იმისთვის, რომ ხალხი გაათავისუფლონ, მორიგ ჯერზე კარგავს შინაარსს.

„უცხო ძალებს, ვისი შეკვეთითაც ხდება მოქმედება, მიაჩნიათ, რომ აქ რაღაც მაინც უნდა დუღდეს, რომ შემდეგ სხვანაირად ილაპარაკონ ან არ ილაპარაკონ.

ადვილი შესამჩნევია, რომ აქ მოქმედების სივრცე არ არსებობს. ყველა ხვდება, რომ აზრი აღარ აქვს და დამთავრდა ეს პროტესტი, ყველა ხვდება, რომ განწყობებზე ეს არ აისახა. აგერ გაჟონა IRI- ის კვლევამ, სადაც პრაქტიკულად მთელი სურათი რამდენიმე სლაიდში, რაც ჩვენ ვნახეთ, სრულად არის მოცემული. ხელისუფლების მხარდაჭერა არ დაკლებულა, ოპოზიციის მხარდაჭერა გაქრა.

გაქრა მარტივი მიზეზის გამო, რადგან 800 000 ადამიანი ოპოზიციურმა სპექტრმა უბრალოდ გადააგდო. მათ დემოკრატიული პროცესის ნაცვლად შესთავაზეს რევოლუცია. ვიღა 8 000 ადამიანი ამას აჰყვა და შემდეგ ისიც დაიშალა. ჩვენ ახლა ვხედავთ 800 ადამიანს და ბოლოს ყოველდღიურად 80 ადამიანს. ეს 80 ადამიანი არაფრით განსხვავდება სხვა მსგავსი ტრადიციული ჯგუფებისგან, უბრალოდ ისინი სარგებლობენ ამ მხარდაჭერით“, - აღნიშნა გურამ ნიკოლაშვილმა.