არჩილ გორდულაძე რადიკალების მიერ IRI-ის კვლევის დამალვაზე: ალბათ, შეზარა იმ პოლიტიკურმა სარკემ და ამ პოლიტიკურ სარკეში დანახულმა აჩრდილმა „კოლექტიური ნაცმოძრაობა“, რომელიც იხილეს

ალბათ, შეზარა იმ პოლიტიკურმა სარკემ და ამ პოლიტიკურ სარკეში დანახულმა აჩრდილმა „კოლექტიური ნაცმოძრაობა“, რომელიც იხილეს, - განაცხადა გადაცემაში „იმედი LIVE“ იურიდიულ საკითხთა საპარლამენტო კომიტეტის თავმჯდომარემ არჩილ გორდულაძემ რადიკალების მიერ IRI-ის კვლევის დამალვასთან დაკავშირებით.

გორდულაძის თქმით, ეს არის საქართველოში არსებული რეალობის კვლევა, იმ რეალობისა, რომელიც კოლექტიური „ნაცებისთვის“ შემზარავია.

„როგორც წესი, პოლიტიკური პარტია უკვეთავს ხოლმე IRI-ის კვლევას. შემდეგ კვლევის შედეგები ეგზავნება დამკვეთს და გასაჯაროვდება ხოლმე, სადაც მითითებული უნდა იყოს მეთოდოლოგია, რამდენი ადამიანი გამოიკითხა, ცდომილების ზღვარი რა არის და ა.შ. მაგრამ ეს ყველაფერი არ მოხდა. ლოგიკური კითხვაა, რატომ არ მოხდა. ალბათ, შეზარა იმ პოლიტიკურმა სარკემ და ამ პოლიტიკურ სარკეში დანახულმა აჩრდილმა „კოლექტიური ნაცმოძრაობა“, რომელიც იხილეს“, - აღნიშნა მან.

გორდულაძის განცხადებითვე, მიუხედავად მათი პატრონების მითითებებისა, რომ ხან გაიყვნენ, ხან შეერწყნენ ერთმანეთს, ხან ერთმანეთი ლანძღეს, ხან სხვადასხვა ქვეყნის დედაქალაქში იარეს, მათ შორის სტრასბურგში, ქართველმა ამომრჩეველმა მხარი „ქართულ ოცნებას“ დაუჭირა.

„მთავარი რა არის, ამომრჩეველი რას ფიქრობს. დედამიწის ზურგზე არავის მოუფიქრებია იმაზე უკეთესი სოციალური კვლევა, როგორიც არის არჩევნები. 2024 წელს, მილიონ 120 ათასმა ადამიანმა, ამ ქვეყნის მოქალაქემ მხარი დაუჭირა ჩვენს გუნდს. იგივე განმეორდა 2025 წელს, მაგრამ „ნაცმოძრაობა“ რას შვრება, რაც მეტად რწმუნდება, რომ ქართველ საზოგადოებაში მას მხარდაჭერა არ აქვს საერთოდ, მით უფრო მეტად გადადიან ისინი გარეთ“, - აღნიშნა მან.

კვლევის შედეგებით ჯამში, რვა ოპოზიციურ პარტიას 16 პროცენტი აქვს, მმართველ გუნდს კი ალოკაციის გარეშე - 36.