რატი იონათამიშვილი: აშშ-ის მხრიდან ევროპის საბჭოს ანტიკორუფციული სახელმწიფო ჯგუფის დატოვების შესახებ ინფორმაცია არის ლოგიკური გაგრძელება იმ დამოკიდებულების, რომელიც დღეს აშშ-ს აქვს

აშშ-ის მხრიდან ევროპის საბჭოს ანტიკორუფციული სახელმწიფო ჯგუფის დატოვების შესახებ ინფორმაცია არის ლოგიკური გაგრძელება იმ დამოკიდებულების, რომელიც დღეს აშშ-ს აქვს, - განაცხადა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე რატი იონათამიშვილმა გადაცემაში „დღის ქრონიკა“.

მისი თქმით, აშშ-ის სახელმწიფო მდივანი დღემდე არ აღიარებს ევროკომისრებს და არ ხვდება მათ, რაც არის აშშ-ის დამოკიდებულების გამოძახილი.

„ცალკეული ბიუროკრატები ძალიან აქტიურად გამოდიოდნენ იზოლაციის მხარდასაჭერად, მათ შორის, ხალხის მიერ არჩეული დემოკრატიული მმართველობების წინააღმდეგაც. არა მხოლოდ საქართველოს მაგალითზე შეგვიძლია ეს ვთქვათ. საბოლოო ჯამში, ისინი თვითონ რჩებიან იზოლაციაში. ის ფაქტი, რომ თუნდაც აშშ-ის სახელმწიფო მდივანი დღემდე არ აღიარებს ევროკომისრებს, არ ხვდება მათ და მათთან ერთად მაგიდასთან დაჯდომას საჭიროდაც არ თვლის, ეს ზუსტად გამოძახილია იმ დამოკიდებულების, რაც დღეს აქტიურია.

ამისი ლოგიკური გაგრძელება დღეს არის აშშ-ის ეს გადაწყვეტილებაც. ისინი ხვდებიან, რომ ეს რგოლები რეალურად არ ემსახურება კონკრეტული საქმის გაკეთებას, პროგრესს ამა თუ იმ მიმართულებით, არამედ არის დამატებითი ბიუროკრატიული ერთეულები, რომელიც რეალური საქმეებისგან აშორებს ქვეყნებს და მათ ურჩევნიათ, პირდაპირ სახელმწიფოებთან ჰქონდეთ ურთიერთობა, ოფიციალურ პირებს ესაუბრონ და არა იმ ევრობიუროკრატებს, რომლებიც ხალხს არც კი აურჩევია, ისე მოირგეს ეს სავარძლები“, - განაცხადა იონათამიშვილმა.

მისივე თქმით, თუ ევრობიუროკრატები არ შეიცვლებიან, მიმდინარე პროცესი შეუქცევადი იქნება და კიდევ ბევრი სტრუქტურის დატოვების შესახებ გავიგებთ ინფორმაციას.