Rapporteur: საქართველოს ეუთოს თავმჯდომარეობა სურს, თუმცა ევროკავშირი წინააღმდეგია

საქართველოს 2027 წელს ეუთოს თავმჯდომარეობა სურს, თუმცა თბილისის ინიციატივას ევროკავშირის მხარდაჭერა არ აქვს. ინფორმაციას Rapporteur-ი ავრცელებს.

საქართველოს საგარეო საქმეთა მინისტრმა მაკა ბოჭორიშვილმა გასულ კვირას განაცხადა, რომ საქართველო ოფიციალურად წარადგენს საკუთარ კანდიდატურას და ეუთოს 57 მონაწილე სახელმწიფოს მხარდაჭერის მოპოვებას შეეცდება.

„საქართველოს სურს, 2027 წელს ეუთოს თავმჯდომარე ქვეყანა გახდეს და მზად არის, ყველა მონაწილე სახელმწიფოსთან ითანამშრომლოს“, - განაცხადა ბოჭორიშვილმა ნიუ-იორკში, გაეროს გენერალური ასამბლეის ფარგლებში ეუთოს წარმომადგენლებისთვის გამართულ მიღებაზე.

ეუთო ევროპის, აშშ-ისა და რუსეთის მონაწილეობით მოქმედი მთავარი მრავალმხრივი უსაფრთხოების ფორუმია. ბოლო წლებში ორგანიზაციის საქმიანობა მნიშვნელოვნად შეფერხდა, რადგან ყველა გადაწყვეტილების მისაღებად მონაწილე სახელმწიფოების კონსენსუსია საჭირო, წერს გამოცემა.

ამ დროისთვის ეუთოს თავმჯდომარეობის ერთადერთი ოფიციალური კანდიდატი კვიპროსია, რომელსაც ევროკავშირის ქვეყნების ფართო მხარდაჭერა აქვს. თუმცა, დიპლომატების ცნობით, კვიპროსის კანდიდატურას თურქეთი ბლოკავს.

უთანხმოებამ ეუთო 2027 წლის თავმჯდომარეობის საკითხზე კონსენსუსის გარეშე დატოვა, რაც საქართველოს შესაძლებლობას აძლევს, თავი ალტერნატიულ კანდიდატად წარმოაჩინოს, იუწყება გამოცემა.

Rapporteur-მა ევროკავშირის საგარეო საქმეთა პრესსპიკერს კრისტიან უიგანდს ჰკითხა, კვლავ უჭერს თუ არა ევროკავშირი მხარს კვიპროსის კანდიდატურას და განიხილავს თუ არა ალტერნატიულ კანდიდატს ან ჩიხიდან გამოსვლის სხვა გზას. უიგანდმა პირველ კითხვაზე მოკლედ „დიახ“, ხოლო მეორეზე - „არა“ უპასუხა.

თბილისისთვის ეუთოს თავმჯდომარეობა მნიშვნელოვანი დიპლომატიური პლატფორმა იქნება იმ პერიოდში, როდესაც საქართველოს ურთიერთობები ევროკავშირთან და რამდენიმე დასავლურ ქვეყანასთან გაუარესებულია, აღნიშნულია სტატიაში.

შემდეგი მნიშვნელოვანი თარიღი ეუთოს მინისტრთა საბჭოს სხდომაა, რომელიც 3-4 დეკემბერს შვეიცარიის ქალაქ ლუგანოში გაიმართება. ეს იქნება შვეიცარიის 2026 წლის თავმჯდომარეობის ფარგლებში ორგანიზაციის ბოლო მნიშვნელოვანი შეხვედრა.

მოსალოდნელია, რომ დეკემბრის მინისტერიალს რუსეთის საგარეო საქმეთა მინისტრი სერგეი ლავროვი პირადად დაესწრება, რაც მისი ევროპაში ერთ-ერთი იშვიათი ვიზიტი იქნება.

შვეიცარიის საგარეო საქმეთა მინისტრმა და ეუთოს მოქმედმა თავმჯდომარემ იგნაციო კასისმა მიმდინარე თვეს განაცხადა, რომ შეხვედრას შესაძლოა რუსეთისა და აშშ-ის პირველი დიპლომატებიც დაესწრონ და მას დიალოგის შესაძლებლობა უწოდა. ლავროვმა და კასისმა ლუგანოს მინისტერიალის მოსამზადებელ საკითხებზე გასულ კვირას ნიუ-იორკში გამართულ შეხვედრაზეც ისაუბრეს.

ბოლო პერიოდში ეუთოში აშშ-სა და რუსეთს შორის ურთიერთობების გარკვეული გააქტიურება შეინიშნება, მაშინ, როდესაც ევროკავშირის ქვეყნები მოსკოვთან მაღალი დონის დიპლომატიური კონტაქტების მიმართ გაცილებით უფრო მკაცრ მიდგომას ინარჩუნებენ.

როგორც Rapporteur-ი იუწყება, თუ თურქეთი კვიპროსის კანდიდატურის დაბლოკვას გააგრძელებს, ლუგანოს შეხვედრაზე საქართველოს კანდიდატურა შესაძლოა ალტერნატიულ ვარიანტად განიხილონ.

თუმცა, საქართველოს კანდიდატურას ევროკავშირის 27 წევრ ქვეყანას შორისაც აქვს წინააღმდეგობა. დიპლომატების ცნობით, განსაკუთრებით უარყოფითად არიან განწყობილი ბალტიის ქვეყნები, რაც საქართველოსა და ევროკავშირს შორის გაუარესებულ ურთიერთობებთან და რუსეთთან მიმართებით თბილისის პოლიტიკასთან დაკავშირებულ შეშფოთებას ასახავს.

2027 წლის თავმჯდომარეობისთვის საკუთარი კანდიდატურის წარდგენას სერბეთიც განიხილავს, განუცხადა ერთ-ერთმა მაღალჩინოსანმა დიპლომატმა Rapporteur-ს. ბელგრადის შესაძლო გადაწყვეტილებამ შესაძლოა ბრიუსელის დილემა კიდევ უფრო გაართულოს, განსაკუთრებით ევროკავშირსა და სერბეთს შორის დაძაბული ურთიერთობებისა და ომის დამნაშავე რატკო მლადიჩის დაკრძალვასთან დაკავშირებული ბოლო დაპირისპირების ფონზე.