The Guardian: დონალდ ტრამპმა უკრაინა გაყიდა

ბრიტანული გამოცემა The Guardian-ი ვრცელ ანალიტიკურ სტატიას აქვეყნებს სათაურით „ტრამპმა უკრაინა გაყიდა“.

The Guardian-ის შეფასებით, აშშ-ის პრეზიდენტის დონალდ ტრამპის მცდელობა, უკრაინა რუსეთთან დათმობებზე წასვლას აიძულოს, საფრთხეს უქმნის არა მხოლოდ უკრაინის სუვერენიტეტს, არამედ დასავლეთის ერთიანობასა და ნატოს მომავალსაც.

გამოცემის სარედაქციო სტატიის თანახმად, ევროპამ და სხვა დემოკრატიულმა სახელმწიფოებმა ვაშინგტონის პოლიტიკის წინააღმდეგ უფრო მკაფიო და ქმედითი ნაბიჯები უნდა გადადგან.

ისტორიული პარალელები ყოველთვის ზუსტი არ არის და არც ერთი კონფლიქტი სრულად არ იმეორებს მეორეს. თუმცა, დონალდ ტრამპის მცდელობა, ვლადიმირ პუტინთან დათმობებზე წავიდეს, The Guardian-ის შეფასებით, სახიფათოდ მოგვაგონებს ნევილ ჩემბერლენის წარუმატებელ მცდელობას, 1938 წელს მიუნხენში ნაცისტურ გერმანიასთან შეთანხმებით ომი თავიდან აეცილებინა.

გამოცემა აღნიშნავს, რომ ბრიტანეთის იმდროინდელ პრემიერ-მინისტრს, რომელსაც ისტორია ხშირად უსამართლოდ აფასებს, მშვიდობის დამყარების მცდელობაში ბრიტანეთისა და საფრანგეთის მოსახლეობის დიდი ნაწილი უჭერდა მხარს. პირველი მსოფლიო ომის საშინელებების განმეორების თავიდან აცილება თავად მოქალაქეებსაც სურდათ.

The Guardian-ის თანახმად, ტრამპს უკრაინის საკითხზე მსგავსი საზოგადოებრივი მხარდაჭერა არ აქვს და არც რუსეთთან პირდაპირი ომის საფრთხის წინაშე დგას. გამოცემის შეფასებით, უკრაინის ინტერესების ღალატი ტრამპისთვის პირადი სარგებლის მიღების ცინიკური მცდელობაა, რომელსაც გლობალური უსაფრთხოებისთვის სახიფათო შედეგები შეიძლება მოჰყვეს.

გამოცემის ცნობით, აშშ-სა და რუსეთს შორის მოლაპარაკებები უკრაინისთვის არასახარბიელო პირობების შეთანხმების შესახებ უკვე მოწინავე ეტაპზეა. ეს პროცესი სანქტ-პეტერბურგში გამართული შეხვედრების შემდეგ გააქტიურდა.

თეთრ სახლში დაბრუნების შემდეგ ტრამპი უკრაინის ომის საკითხზე პოზიციას არაერთხელ ცვლიდა. The Guardian-ის შეფასებით, ახლა, როდესაც მისი რეიტინგი რეკორდულად დაბალია, აშშ-ის პრეზიდენტი ცდილობს, პასუხისმგებლობა უკრაინას დააკისროს და ქვეყანა ფაქტობრივ კაპიტულაციამდე მიიყვანოს.

გამოცემა ტრამპის ბოლო ნაბიჯებს შორის ასახელებს რუსეთისგან დიზელის საწვავის შესყიდვას, რაც, მისი შეფასებით, პუტინის სამხედრო მანქანის დაფინანსებას უწყობს ხელს; უფრო მკაცრი სანქციების გაუქმებას; უკრაინისთვის აშშ-ის სატელიტური და სადაზვერვო ინფორმაციის მიწოდების შეწყვეტის ეპიზოდებს, რომლებსაც გამოცემა სასიკვდილო შედეგების პოტენციალის მქონედ მიიჩნევს; ასევე, უკრაინის პრეზიდენტ ვოლოდიმირ ზელენსკის ხელისუფლებიდან ჩამოშორების მცდელობის განახლებას.

სტატიის ავტორი ტრამპის ქმედებებს იუდას ღალატსა და თანამედროვე ეპოქის სიმხდალეს ადარებს და წერს, რომ ამ ფონზე ნევილ ჩემბერლენი პრინციპულობის მაგალითადაც კი შეიძლება გამოიყურებოდეს.