Financial Times: Standard Chartered-მა, Citigroup-მა და სხვა საერთაშორისო ბანკებმა მილიარდობით დოლარის ტრანზაქციები გაატარეს კრემლის მიერ მხარდაჭერილი იმ ფინტექ-კომპანიის სასარგებლოდ, რომელმაც დოკუმენტების მასშტაბური გაყალბებით გლობალურ ფინანსურ სისტემაში შეაღწია

Standard Chartered-მა, Citigroup-მა და სხვა საერთაშორისო ბანკებმა მილიარდობით დოლარის ტრანზაქციები გაატარეს კრემლის მიერ მხარდაჭერილი იმ ფინტექ-კომპანიის სასარგებლოდ, რომელმაც დოკუმენტების მასშტაბური გაყალბების გზით გლობალურ ფინანსურ სისტემაში შეღწევა მოახერხა, - წერს გამოცემა Financial Times-ი.

Financial Times-ის მიერ მოპოვებული ასობით ათასი შიდა დოკუმენტი ჯგუფი A7-იდან - რომელიც დასავლური საგადახდო სისტემის ალტერნატივად შეიქმნა - ააშკარავებს, თუ როგორ იყენებდა ის ფულის გათეთრების კლასიკურ მეთოდებს რუსეთის წინააღმდეგ დაწესებული სანქციების გვერდის ავლით საერთაშორისო საბანკო სისტემაში 6.9 მილიარდ დოლარზე მეტის გასატარებლად.

გაჟონილი მასალების თანახმად, ტრანზაქციების ნაწილი უშუალოდ უკავშირდებოდა ომისთვის განკუთვნილ განსაკუთრებით სენსიტიურ პროდუქციას, მათ შორის სამხედრო ტექნიკასა და რუსეთის სპეცსამსახურების მიერ განხორციელებულ შესყიდვებს.

მიუხედავად იმისა, რომ A7 საკუთარ ფინანსურ ინოვაციებს საჯაროდ იწონებდა, გადარიცხვების შესასრულებლად და Swift-ის სისტემაზე წვდომისთვის ის ფიქტიური ფირმებისა და მოქმედი ბიზნესების ქსელს ეყრდნობოდა. ამ შუამავლების კვალის დასაფარად კი კომპანია ყალბი ინვოისების დამზადების მასშტაბურ, ინდუსტრიულ ოპერაციას მიმართავდა.

მხოლოდ ჰონგ-კონგის Standard Chartered-ში არსებულ ანგარიშებზე A7-თან დაკავშირებული სუბიექტებისგან 1.1 მილიარდი დოლარი შევიდა 2024 წლის ბოლოდან (A7-ის დაფუძნებიდან) 2025 წლის აგვისტომდე. იმავე პერიოდში ჰონგ-კონგის DBS-ში 273 მილიონი დოლარი გადაირიცხა, ხოლო Citigroup-ის კლიენტთა ანგარიშებზე - 74 მილიონი დოლარი.

ევროპაში Deutsche Bank-ის კლიენტთა ანგარიშებზე დაახლოებით 18 მილიონი დოლარი გადაირიცხა.

A7-მა არაბთა გაერთიანებული საამიროების უდიდეს ბანკში, First Abu Dhabi-ში, 17 სხვადასხვა სუბიექტისთვის გახსნა ანგარიშები, საიდანაც 1.8 მილიარდ დოლარზე მეტის გასავალი ტრანზაქციები განხორციელდა. გარდა ამისა, კომპანიამ ანგარიშები JPMorgan Chase-სა და DBS-შიც გახსნა.

A7 თავდაპირველად რუსეთსა და ყირგიზეთში მოლდოველმა ოლიგარქმა, ილან შორმა დააფუძნა, რუსეთის თავდაცვის მრეწველობასთან მჭიდროდ დაკავშირებული სახელმწიფო ბანკის - Promsvyazbank-ის (PSB) მხარდაჭერით.

კრემლი A7-ს იმპორტისთვის განკუთვნილი საერთაშორისო გადარიცხვების მთავარ ეროვნულ პროვაიდერად წარმოაჩენდა მას შემდეგ, რაც 2022 წელს, უკრაინაში სრულმასშტაბური შეჭრის გამო, რუსული ბანკები Swift-ის სისტემიდან გათიშეს.