Financial Times: სატელეფონო საუბრისას დონალდ ტრამპმა უკრაინელ კოლეგას მოუწოდა, შეაჩეროს თავდასხმები რუსულ ნავთობგადამამუშავებელ ქარხნებზე - ტრამპის შეშფოთებას იწვევს ის, რომ ეს თავდასხმები დიზელის გლობალურ დეფიციტს ამწვავებს და ფასების ზრდას უწყობს ხელს

სატელეფონო საუბრისას დონალდ ტრამპმა უკრაინელ კოლეგას, ვოლოდიმირ ზელენსკის მოუწოდა, შეაჩეროს თავდასხმები რუსულ ნავთობგადამამუშავებელ ქარხნებზე - ტრამპის შეშფოთებას იწვევს ის, რომ ეს თავდასხმები დიზელის გლობალურ დეფიციტს ამწვავებს და ფასების ზრდას უწყობს ხელს. ინფორმაციას ამის შესახებ გამოცემა Financial Times-ი ინფორმირებულ წყაროებზე დაყრდნობით ავრცელებს.

აშშ-ის პრეზიდენტის მთავარი გზავნილი ეხებოდა „დიზელს, დიზელს... დიზელს“ და იგი მოუწოდებდა ზელენსკის, თავისი სამხედროებისთვის დრონებითა და რაკეტებით თავდასხმების შეწყვეტის ბრძანება გაეცა - განუცხადა FT-ს უკრაინელმა მაღალჩინოსანმა, რომელიც საუბარს ესწრებოდა.

საუბრის დეტალებში ჩახედულმა კიდევ ერთმა უკრაინელმა მაღალჩინოსანმა აღნიშნა, რომ ტრამპმა ხაზი გაუსვა თავის შეშფოთებას დიზელის გაძვირების გამო და დასძინა, რომ სურს უზრუნველყოს გლობალურ ბაზარზე რუსული პროდუქციის მიწოდება, რათა ფასების წნეხი შემცირდეს.

საუბრის შემდეგ გავრცელებულ განცხადებაში ზელენსკიმ აღნიშნა, რომ ეს იყო „მნიშვნელოვანი საუბარი“ და ტრამპთან მისი შეხვედრა, რომელიც ამ კვირაში გაეროს გენერალური ასამბლეის ფარგლებში იგეგმება, „ბევრ რამეს შეცვლიდა“. მისი ოფისის ცნობით, შეხვედრა სამშაბათს იგეგმება.