პოდოლიაკი: ტრამპი აშშ-ის რეპუტაციას სრულად ანადგურებს - ადამიანი, რომელიც ცალმხრივად დაარქმევს მექსიკის ყურეს ამერიკის ყურეს, მისგან რამე სერიოზულს ელოდო ძალიან რთულია

აშშ-ის პრეზიდენტი, დონალდ ტრამპი სრულად ანადგურებს შეერთებული შტატების რეპუტაციას. ამის შესახებ უკრაინის პრეზიდენტის ოფისის ხელმძღვანელის მრჩეველმა, მიხაილო პოდოლიაკმა განაცხადა.

მისი თქმით, ტრამპი ცხოვრობს სამყაროში, სადაც მთავარი სოციალურ ქსელებში რაღაცის გამოქვეყნებაა და არა ის, თუ რა ხდება რეალურად.

„მან გამოაცხადა, რომ თითქოს 44-ჯერ მოიგო ომი ირანთან. ალბათ არსებობს გარკვეული აუდიტორია, რომელიც ამ ტვიტებს კითხულობს და სჯერა, რომ მან ერთი და იგივე ომი 44-ჯერ მოიგო. ანუ, ადამიანი ამ რეალობაში ცხოვრობს და ამ რეალობაშივე დგამს გარკვეულ ნაბიჯებს. ახლა ეს ადამიანი სრულად ანადგურებს შეერთებული შტატების რეპუტაციას. ადამიანი, რომელიც ცალმხრივად დაარქმევს მექსიკის ყურეს ამერიკის ყურეს, ან მთვარის კრატერს - ამერიკულ კრატერს (იმედი მაქვს, ამასაც გააკეთებს, ეს ძალიან მნიშვნელოვანია) და ა.შ. პატიოსნად რომ ვთქვათ, მისგან რამე სერიოზულს ელოდო ძალიან რთულია“, - აღნიშნა პოდოლიაკმა.

უკრაინის პრეზიდენტის ოფისის მრჩევლის შეფასებით, პროცესებს, რომლებსაც ახლა ვხედავთ, გლობალური ურთიერთობებისთვის უკვე აქვს და მომავალშიც ექნება ძალიან მძიმე შედეგები, რადგან ბევრი „უზურპატორი და წესების დამრღვევი“ ახლა შესაძლებლობების ფანჯარას ხედავს.

„აიღეთ თუნდაც პუტინი - მერწმუნეთ, შეერთებული შტატები მკაცრ შეთანხმებებს რომ იცავდეს და ხისტ ზეწოლას ახორციელებდეს, პუტინი სულ სხვაგვარად მოიქცეოდა. ახლა კი მას ესმის, რომ არ არსებობს წესები და არ არსებობენ „ზედამხედველები“, რომლებიც თვალყურს ადევნებენ, რომ წესების დამრღვევებმა ზღვარი არ გადალახონ“, - განაცხადა მიხაილო პოდოლიაკმა.