მადიარის განცხადებით, მისი ქვეყანა არ არის უკრაინის მიერ ინიცირებული „კარპატების რვიანის“ წევრი, რომლის მიზანიც კარპატების რეგიონის ქვეყნებს შორის თანამშრომლობის გაღრმავებაა

უნგრეთის პრემიერ-მინისტრის, პეტერ მადიარის განცხადებით, მისი ქვეყანა არ არის უკრაინის მიერ ინიცირებული „კარპატების რვიანის“ წევრი, რომლის მიზანიც კარპატების რეგიონის ქვეყნებს შორის თანამშრომლობის გაღრმავებაა.

საკანონმდებლო ორგანოში გამოსვლისას მადიარმა აღნიშნა, რომ ბუდაპეშტმა უკრაინული მხარისგან მიიღო მიწვევა, თუმცა წინადადებაზე უარი თქვა.

„ჩვენ მოგვიწვიეს, თუმცა საპატიო მიზეზების გამო არ წავედით. უნგრეთი ამ პროცესში არ მონაწილეობს“, - განაცხადა უნგრეთის პრემიერმა.

მას უარის თქმის კონკრეტული მიზეზები არ დაუკონკრეტებია.

ახალი პლატფორმის - „კარპატების რვიანის“ შექმნის შესახებ უკრაინის პრეზიდენტმა, ვოლოდიმირ ზელენსკიმ 18 სექტემბერს გამოაცხადა.

ჩანაფიქრის მიხედვით, გაერთიანებაში უკრაინასთან ერთად ევროპის შვიდი ქვეყანა - რუმინეთი, სერბეთი, პოლონეთი, სლოვაკეთი, ჩეხეთი, ავსტრია, უნგრეთი - და ევროკავშირი უნდა გაწევრიანებულიყვნენ.

პირველი „კარპატების სამიტის“ შედეგად, უკრაინის, ავსტრიის, პოლონეთის, რუმინეთის, სერბეთისა და სლოვაკეთის ლიდერებმა ერთობლივი დეკლარაცია მიიღეს.