Politico, CNN-ი და MS NOW თეთრ სახლში ჟურნალისტების არდაშვების გამო ტრამპს უჩივიან

Politico-მ, CNN-მა და MS NOW-მ განაცხადეს, რომ ფედერალურ სარჩელს შეიტანენ თავიანთი რეპორტიორებისთვის წვდომის დაუყოვნებლივ აღსადგენად, რომლებსაც აშშ-ის პრეზიდენტმა დონალდ ტრამპმა რამდენიმე დღის წინ თეთრი სახლის კომპლექსში შესვლა აუკრძალა.

„დღეს დილით მთავრობას ვაცნობეთ, რომ შეგვაქვს სარჩელი აშშ-ის კონსტიტუციის პირველი შესწორებით გარანტირებული ჩვენი უფლებების დასაცავად და იმ პრინციპის დასამკვიდრებლად, რომლის მიხედვითაც მთავრობას არ აქვს უფლება გადაწყვიტოს, თუ რა უნდა გააშუქოს ან გამოაქვეყნოს პრესამ“, - აცხადებენ მედიაორგანიზაციები.

მათ ხაზგასმით აღნიშნეს, რომ „გაფრთხილებისა და ჯეროვანი პროცედურების დაცვის გარეშე, თეთრმა სახლმა ჟურნალისტებს აკრედიტაცია გაუუქმა, რადგან მათ მიერ მომზადებულ მასალებს არ დაეთანხმა“.

„თუ ეს შესაბამისი რეაგირების გარეშე დარჩება, საფრთხე შეექმნება პრესის თავისუფლებასა და საზოგადოების უფლებას, ჰქონდეს დამოუკიდებელი ჟურნალისტიკა, რომელიც თავისუფალია მთავრობის ჩარევისგან“, - დასძინეს მათ.

ახლა ორგანიზაციები ვაშინგტონის ოლქის აშშ-ის სასამართლოს მოსამართლეს სთხოვენ, რაც შეიძლება მალე ცნოს ტრამპის აკრძალვა არაკონსტიტუციურად და არ დაუშვას მისი თანაშემწეების მიერ ამ გადაწყვეტილების აღსრულება.

თეთრი სახლისა და იუსტიციის დეპარტამენტის წარმომადგენლებს ამ საკითხზე კომენტარი ჯერ არ გაუკეთებიათ.