იტალიის მთავრობა სკოლებში ბურკისა და ნიქაბის ტარების აკრძალვას გეგმავს

იტალიის პრემიერ-მინისტრმა ჯორჯია მელონიმ განაცხადა, რომ მთავრობა ამზადებს კანონპროექტს, რომელიც სკოლებში ბურკისა და ნიქაბის ტარებას აკრძალავს, ასევე შეზღუდავს კლასებში უცხოელი მოსწავლეების რაოდენობას. შესაბამისი განცხადებით მელონი თავისი პარტიის, „იტალიის ძმების“ ახალგაზრდული ფრთის ღონისძიებაზე გამოვიდა.

„იტალიის სკოლაში ღია სახით უნდა იარო და არავის შეუძლია რეალურ თუ სავარაუდო ტრადიციას ამოფარებულმა გადაწყვიტოს, რომ ახალგაზრდა ქალმა საკუთარი თავი უნდა დაფაროს“, - განაცხადა მთავრობის მეთაურმა.

გარდა ამისა, ხელისუფლება გეგმავს, იმ უცხოელი მოსწავლეების მშობლებს, რომელთაც „ინტეგრაციის სერიოზული სირთულეები“ აქვთ, იტალიური ენის შესწავლა დაავალდებულოს. კიდევ ერთი ზომა ერთ კლასში უცხოელი მოსწავლეების მაქსიმალურ რაოდენობაზე ზღვრის დაწესება იქნება. მთავრობის ხელმძღვანელმა აღნიშნა, რომ თუ იმ ბავშვების რაოდენობა, რომლებიც იტალიურ ენას ვერ ფლობენ, „ძალიან დიდი“ ხდება, ინტეგრაცია ფუნქციონირებას წყვეტს. მელონის არ დაუზუსტებია, კონკრეტულად, რა ლიმიტის დაწესება იგეგმება.

კვლევით ცენტრ ISMU-ს მონაცემებით, იტალიის მოქალაქეობის არმქონე მოსწავლეები ქვეყნის ყველა სკოლის მოსწავლეთა 11,6%-ს შეადგენენ.