მარინ ლე პენმა და ჟორდან ბარდელამ განაცხადეს, რომ რუსეთი მუქარითა და დაშინებით საფრანგეთის პოლიტიკაზე გავლენას ვერ მოიპოვებს

არ შევეგუებით, რომ რუსეთს შეიძლება, იმედი ჰქონდეს პირდაპირ ან ირიბად გვიკარნახოს ჩვენი ქვეყნის პოლიტიკა დაშინების, მუქარის, დესტაბილიზაციის ან ფსიქოლოგიური ზეწოლის გზით, - აღნიშნულია ფრანგული ულტრამემარჯვენე პარტიის „ეროვნული გაერთიანების“ ლიდერების, მარინ ლე პენისა და ჟორდან ბარდელას განცხადებაში. პოლიტიკოსებმა ეს განცხადება ელისეს სასახლეში საფრანგეთის პრეზიდენტ ემანუელ მაკრონსა და პოლიტიკური პარტიების ლიდერებს შორის გამართული შეხვედრის შემდეგ გაავრცელეს. შეხვედრა გეოპოლიტიკურ საფრთხეებს მიეძღვნა.

„არცერთ პროვოკაციას, არცერთ ფარულ ოპერაციასა და დესტაბილიზაციისკენ მიმართულ არცერთ ქმედებას არ შეუძლია აიძულოს საფრანგეთი, ხელი შეუწყოს უკრაინაში რუსეთის მიერ სამხედრო მიზნების მიღწევას. საფრანგეთის საგარეო პოლიტიკა პარიზში სუვერენულად განისაზღვრება, მხოლოდ და მხოლოდ ერის ინტერესებიდან გამომდინარე. ის ვერ განისაზღვრება ვერც მოსკოვში და ვერც რომელიმე სხვა უცხოურ დედაქალაქში“, - განაცხადეს ლე პენმა და ბარდელამ.

მათ მხარი დაუჭირეს „ყველა აუცილებელ ზომას“ საფრანგეთის სტრატეგიული ინფრასტრუქტურის, ეროვნულ თავდაცვაში ჩართული ობიექტებისა და საწარმოების უსაფრთხოების გასაძლიერებლად.

პარტიის ლიდერებმა აღნიშნეს, რომ საფრანგეთის პოლიტიკა უკრაინასთან დაკავშირებით დემოკრატიული დებატების საგანი უნდა იყოს. „ეს დებატები კანონიერია. საგარეო ზეწოლა - არა“, - აღნიშნულია განცხადებაში.