ჩინეთი აშშ-ის „ჯოჯოხეთურ“ სანქციებზე: ვიტოვებთ უფლებას, მივიღოთ ყველა აუცილებელი ზომა საკუთარი ინტერესების დასაცავად

ჩინეთი ეწინააღმდეგება ცალმხრივ სანქციებს და იმედოვნებს, რომ აშშ პეკინისკენ „ნაბიჯს გადადგამს“, - ასე გამოეხმაურა ჩინეთის ვაჭრობის სამინისტრო დონალდ ტრამპის გადაწყვეტილებას რუსეთის წინააღმდეგ ახალი, „ჯოჯოხეთური“ სანქციების შესახებ კანონის ხელმოწერასთან დაკავშირებით, რაც ითვალისწინებს 100%-იან ტარიფებს იმ ქვეყნებიდან იმპორტირებულ საქონელზე, რომლებიც რუსულ ნავთობს ყიდულობენ.

სამინისტროს განცხადებაში ნათქვამია, რომ ჩინეთი ასევე ეწინააღმდეგება მეორად სანქციებს იმ ქვეყნების მიმართ, რომლებიც მესამე მხარეებთან თანამშრომლობენ.

„ჩინეთი ყოველთვის ახორციელებდა ნორმალურ სავაჭრო-ეკონომიკურ თანამშრომლობას ქვეყნებთან თანასწორობისა და ორმხრივი სარგებლის პრინციპებზე დაყრდნობით. ასეთი თანამშრომლობა არ არის მიმართული მესამე მხარეების წინააღმდეგ და არ უნდა ექვემდებარებოდეს მათგან ჩარევას ან ზეწოლას. ჩვენ ყურადღებით დავაკვირდებით აშშ-ის შემდგომ ნაბიჯებს და ვიტოვებთ უფლებას, მივიღოთ ყველა აუცილებელი ზომა ჩინეთის სახელმწიფო სუვერენიტეტისა და განვითარების ინტერესების, ასევე ჩინური საწარმოების კანონიერი უფლებებისა და ინტერესების დასაცავად“, - განაცხადეს სამინისტროში.

დონალდ ტრამპმა რუსეთის წინააღმდეგ ახალი სანქციების შესახებ კანონს ხელი 19 სექტემბერს მოაწერა. ის პრეზიდენტს უფლებას აძლევს, 100%-იანი საბაჟო ტარიფები დააწესოს აშშ-ში საქონლის იმპორტზე ხუთი ქვეყნიდან, რომლებიც რუსული ენერგორესურსების უმსხვილესი მყიდველები არიან. გარდა ამისა, კანონი ითვალისწინებს სანქციებს რუსული თავდაცვითი, ენერგეტიკული და ფინანსური ორგანიზაციების, რუსეთის „ჩრდილოვანი ფლოტის“, ასევე რუსეთის ხელმძღვანელობის წინააღმდეგ. რუსული ნავთობის უმსხვილესი იმპორტიორები ჩინეთი და ინდოეთი არიან.