მოსკოვის ოლქს ასობით დრონმა შეუტია

მოსკოვსა და მოსკოვის ოლქს 200-ზე მეტი დრონი დაესხა თავს. არის მსხვერპლი. Telegram-არხ ASTRA-ს ანალიზის მონაცემებით, ხანძარია მოსკოვის კაპოტნიას რაიონში მდებარე ნავთობგადამამუშავებელ ქარხანაში.

მოსკოვის მერმა, სერგეი სობიანინმა მოსკოვთან მიახლოებისას 186 უპილოტო საფრენი აპარატის ჩამოგდების შესახებ განაცხადა. მისივე ცნობით, დაზიანდა მოსკოვის ნავთობგადამამუშავებელი ქარხნის ტერიტორიაზე არსებული ობიექტი.

რეგიონის გუბერნატორის, ანდრეი ვორობიოვის თქმით, ადგილობრივი დროით 03:00-დან 05:00 საათამდე მოსკოვის ოლქის თავზე 249 უპილოტო საფრენი აპარატი ჩამოაგდეს.

ვრცელდება ინფორმაცია მრავალბინიანი საცხოვრებელი სახლების დაზიანების შესახებ რამენსკეს, ლენინსკის, ლუბერცის, ლიტკარინოს, ორეხოვო-ზუევოს, კოტელნიკისა და ისტრას ოლქებში. კერძო სახლები დაზიანდა რამენსკეში, კოლომნასა და ეგორიევსკშიც. ცნობილია ორი ადამიანის დაღუპვის შესახებ - სოფინოსა და ორეხოვო-ზუევოს ოლქში.

ვორობიოვის თქმით, სოფინოში თავდასხმის შემდეგ ხანძარი გაჩნდა სასაწყობო კომპლექსში. ASTRA იუწყება, რომ დარტყმის ქვეშ მოჰყვა ერთ-ერთ სასაწყობო კომპლექსი.