თურქეთის მთავრობაში აცხადებენ, რომ რუსეთსა და უკრაინას მარცვლეულის შეთანხმებასთან დაკავშირებით წინადადებები წარუდგინეს

თურქეთის საგარეო საქმეთა მინისტრმა, ჰაკან ფიდანმა განაცხადა, რომ ანკარამ მოსკოვსა და კიევს შავ ზღვაში სიტუაციის დეესკალაციის შესახებ წინადადებები გაუგზავნა. ამ თემაზე მინისტრმა ტელეკომპანია NTV-სთან ინტერვიუში ისაუბრა.

თურქეთის საგარეო უწყების ხელმძღვანელმა დაადასტურა, რომ ანკარამ უკრაინულ და რუსულ მხარეებს შავ ზღვაში დეესკალაციის წინადადებები გაუგზავნა და პასუხს ელოდება. თუმცა, მას ამ ინიციატივის დეტალები არ დაუზუსტებია.

„როგორც ჩანს, ახლა გრძელვადიანი შედეგის მიღწევა საკმაოდ რთულია. გავაგრძელებთ ომს, რომლის გამანადგურებელი ხასიათიც ყველა მხარეს საკმარისად კარგად აქვს გაცნობიერებული და რომელიც ახლა თანდათან მშვიდდება, თუ ვიპოვით გონივრულ კომპრომისს და ვიტყვით: „მოდით, აღარ გავანადგუროთ ერთმანეთი“? ჩვენ წინადადება ორთავე მხარეს გავუგზავნეთ და პასუხს ველოდებით. ვხედავთ, რომ თუ მინდვრებიდან აღებული მარცვლეული მსოფლიო ბაზრებს არ მიეწოდება, ბევრ ქვეყანაში სასურსათო უსაფრთხოების პრობლემები შეიქმნება“, - განაცხადა ფიდანმა.

მინისტრმა გაიხსენა, რომ 2022 წელს, თურქეთისა და გაეროს ხელშეწყობით, რუსეთი და უკრაინა შავი ზღვის პორტების განბლოკვასა და უკრაინული მარცვლეულის უსაფრთხო ექსპორტზე შეთანხმდნენ.

„სინამდვილეში, რამდენიმე წლის წინ ჩვენ დავდეთ შეთანხმება, რომელიც შემდგომში დაირღვა, თუმცა, მიუხედავად ამისა, არსებობდა ფაქტობრივად მოქმედი სისტემა - მხარეები არ ერეოდნენ. თუმცა ახლა ისინი აქტიურად ერევიან ერთმანეთის საქმეებში. კერძოდ, დარტყმებს ახორციელებენ პორტებსა და ყოველგვარ საზღვაო საქმიანობაზე“, - აღნიშნა მინისტრმა.

სექტემბერში თურქეთის პრეზიდენტმა, რეჯეფ თაიფ ერდოღანმა განაცხადა, რომ აუცილებელია მექანიზმი, რომელიც რუსეთ-უკრაინის ომის პირობებში შავ ზღვაში კომერციული საზღვაო გადაზიდვების უსაფრთხოებას უზრუნველყოფდა.

აგვისტოს დასაწყისში თურქეთმა რუსეთსა და უკრაინას მოუწოდა, მიეღოთ ზომები შავ ზღვაში ნაოსნობის უსაფრთხოების უზრუნველსაყოფად მას შემდეგ, რაც რუსული პორტის, ნოვოროსიისკის მახლობლად უპილოტო საფრენი აპარატის თავდასხმის შედეგად თურქული გემი დაზიანდა, ეკიპაჟის სამმა წევრმა კი მძიმე დაზიანებები მიიღო.

ამის შემდეგ მედიამ გაავრცელა ინფორმაცია, რომ თურქეთი, რეგიონში თავდასხმების დიდი რაოდენობით გამოწვეული შეშფოთების გამო, შავ ზღვაში ზოგიერთი კომერციული გემის გადაადგილებას ზღუდავს.