Bloomberg: აშშ მოკავშირეებს აფრთხილებს, რომ მარაგების სიმცირის გამო რაკეტების მიწოდება შესაძლოა, ხუთ წლამდე შეფერხდეს

აშშ მოკავშირეებს აფრთხილებს, რომ მნიშვნელოვანი შეიარაღების მიწოდება შესაძლოა ხუთ წლამდე შეფერხდეს, რადგან ირანთან ომის შედეგად შემცირებული საბრძოლო მასალის მარაგების აღდგენას და საკუთარი არსენალის შევსებას ცდილობს. ინფორმაციას Bloomberg-ი ავრცელებს.

სააგენტოს ცნობით, ევროპის რამდენიმე ქვეყანა მნიშვნელოვანი რაკეტებისა და საჰაერო თავდაცვის სისტემების მიღების გადავადებას ელოდება, რადგან ირანთან ომის შედეგად აშშ-ის სამხედროებმა საკუთარი არსენალის მნიშვნელოვანი ნაწილი ამოწურეს.

გერმანიამ აშშ-ს შორი მანძილზე მოქმედი Tomahawk-ის ფრთოსანი რაკეტებისა და სახმელეთო Typhon-ის გამშვები სისტემების მიწოდების დაჩქარება სთხოვა. თუმცა, აშშ-ის მარაგების შემცირების გამო, ამ შეიარაღების მწარმოებელი კომპანია RTX-ის, Raytheon-ის, შეკვეთის მომდევნო ხუთი წლის განმავლობაში შესრულებას, სავარაუდოდ, ვერ შეძლებს.

კიდევ ორმა ოფიციალურმა პირმა Bloomberg-ს განუცხადა, რომ აღმოსავლეთ ევროპის რამდენიმე ქვეყანას, რომელიც ასევე აშშ-ის შეიარაღების სისტემებზეა დამოკიდებული, მიწოდების შეფერხებები ირანთან ომის დაწყებიდან მალევე შეექმნა. აშშ-მა და ისრაელმა ირანის წინააღმდეგ ომი 28 თებერვალს დაიწყეს.

პენტაგონის გადაწყვეტილება, პრიორიტეტი საკუთარი მარაგების შევსებას მიანიჭოს, ასევე ართულებს უკრაინის მცდელობას, აშშ-გან Patriot-ის დამატებითი რაკეტები მიიღოს, განსაკუთრებით იმ ფონზე, როდესაც ომით დაზარალებულ ქვეყანას რთული ზამთარი ელოდება.

უკრაინისთვის სასიცოცხლოდ მნიშვნელოვანი საჰაერო თავდაცვის საკითხი მომავალ კვირას ნიუ-იორკში დაგეგმილი გაეროს შეხვედრების ერთ-ერთი მთავარი თემა იქნება, წერს გამოცემა.

პრეზიდენტმა დონალდ ტრამპმა მიმდინარე კვირის დასაწყისში ჟურნალისტებს განუცხადა, რომ აშშ უკრაინასთან განიხილავს როგორც Patriot-ის სისტემის „გაცილებით ნაკლებად დახვეწილი ვერსიის“ მიწოდებას, ისე ევროპული ქვეყნებისთვის ამ სისტემების დამოუკიდებლად წარმოების ლიცენზიების გაცემას.

სხვადასხვა შეფასებებით, ირანის წინააღმდეგ ოპერაციებში აშშ-მა ყველაზე თანამედროვე Patriot-ის რაკეტების ვარიანტების მარაგის ნახევარზე მეტი, Tomahawk-ის რაკეტების დაახლოებით მესამედი და მაღალი სიზუსტის მქონე THAAD-ის რაკეტსაწინააღმდეგო რაკეტების, თითქმის. ნახევარი გამოიყენა.

აშშ-ის კონგრესის საბიუჯეტო ოფისის შეფასებით, 2025 წლის ივნისიდან მოყოლებული, აშშ-მა შესაძლოა, საკუთარი რაკეტსაწინააღმდეგო თავდაცვის რაკეტების მარაგის ორ მესამედამდე უკვე გამოიყენა.

სამხედროებმა ირანის სამიზნეების გასანადგურებლად ომის პირველ თვეებში იმდენად დიდი რაოდენობით საბრძოლო მასალა გამოიყენეს, რომ ამას „სტრატეგიული მარაგების დეფიციტი და საბრძოლო მასალის შესავსებად საჭირო წარმოების შესაძლებლობებში არსებული პრობლემები“ მოჰყვა, განაცხადეს პენტაგონის წარმომადგენლებმა უწყების გენერალურ ინსპექტორთან.

ახლა ოფიციალური პირები მუშაობენ კრიტიკული კომპონენტებისა და გარკვეული ტიპის საბრძოლო მასალის მარაგების შესავსებად, ასევე წარმოების ვადების შემცირებაზე, ნათქვამია გენერალური ინსპექტორის ოფისის მიერ ამ კვირაში გამოქვეყნებულ ანგარიშში.

სამხედრო კომპანიები წარმოების გაზრდაზე მუშაობენ. Lockheed Martin ცდილობს ყველაზე თანამედროვე PAC-3 MSE-ის, ანუ Patriot Advanced Capability-3 Missile Segment Enhancement-ის წლიური წარმოების სიმძლავრე დაახლოებით 600 ერთეულიდან 2 000 ერთეულამდე გაზარდოს, აღნიშნულია სტატიაში.

მარაგების დეფიციტი მხოლოდ აშშ-სა და ევროპას არ ეხება. აპრილში აშშ-მ იაპონიას აცნობა, რომ Tomahawk-ის რაკეტების მიწოდება შესაძლოა, ორ წლამდე დაგვიანდეს.

საუდის არაბეთმაც მიმართა მოკავშირეებს, მათ შორის აშშ-ს, სამხედრო დახმარების თხოვნით, რათა იემენში მოქმედი „ჰუსიტების“ თავდასხმების წინააღმდეგ ბრძოლა შეძლოს. ვაშინგტონს ამ ეტაპზე არ განუცხადებია, გაუწევს თუ არა ერ-რიადს დამატებით დახმარებას.

მიუხედავად ამისა, აშშ კვლავ აგრძელებს ევროპელი მოკავშირეების მიერ უკრაინისთვის შეძენილი შეიარაღების მიწოდებას ნატოსა და ევროკავშირის ინიციატივების ფარგლებში, წერს სააგენტო.