CNN: ხელოვნური ინტელექტის მიერ დაშვებული შეცდომის გამო აშშ ჩინეთთან ომის ზღვარზე აღმოჩნდა

აშშ-ის სამხედროები ირანთან ომის მიმდინარეობისას მზად იყვნენ ჩინურ გემზე თავდასხმა განეხორციელებინათ მას შემდეგ, რაც ხელოვნური ინტელექტის დახმარებით მომზადებულმა მცდარმა სადაზვერვო ანგარიშმა დაასკვნა, რომ გემს ახლო აღმოსავლეთში ბირთვული იარაღის პროგრამისთვის განკუთვნილი კომპონენტები გადაჰქონდა. ინფორმაციას CNN-ი რამდენიმე წყაროზე დაყრდნობით ავრცელებს.

სადაზვერვო ანგარიში, რომელიც მიმდინარე წლის გაზაფხულზე, ირანთან ომის დროს, აშშ-ის შეიარაღებულ ძალებში ფართოდ გავრცელდა, დაუყოვნებლივ გახდა განგაშის საფუძველი: ანგარიშის მიხედვით, ახლო აღმოსავლეთში მყოფ ჩინურ გემს ბირთვული იარაღის პროგრამისთვის განკუთვნილი კომპონენტები გადაჰქონდა.

ოთხი წყაროს ინფორმაციით, აშშ-ის სამხედროებმა გემის შესაჩერებლად ოპერაციის მომზადება დაიწყეს. ორი წყაროს ცნობით, აშშ-ის შეიარაღებული ძალების სამხედროები გემზე ასასვლელად ემზადებოდნენ. ერთ-ერთი წყაროსა და ინციდენტის შესახებ ინფორმირებულ კიდევ ერთი პირის ინფორმაციით, იმ დროისთვის სამხედრო თვითმფრინავებიც უკვე ჰაერში იმყოფებოდნენ.

დაგეგმილ ოპერაციამდე ცოტა ხნით ადრე, ოფიციალურმა პირებმა ანგარიშის დეტალური შემოწმება დაიწყეს და დაადგინეს, რომ ის სპეციალური ოპერაციების სარდლობის ერთ-ერთმა ანალიტიკოსმა ხელოვნური ინტელექტის დახმარებით მოამზადა. ასევე გაირკვა, რომ ჩატბოტმა, რომელსაც ანალიტიკოსი იყენებდა, გემის ტვირთი არასწორად ამოიცნო.

ერთ-ერთი წყაროს თქმით, ანგარიში „სრულიად მცდარი“ იყო. თუმცა, მისივე შეფასებით, მას „კინაღამ ომი მოჰყვა“. ჩინურ გემზე აშშ-ის ნებისმიერი ოპერაცია ორ ქვეყანას შორის შეიარაღებული კონფლიქტის ესკალაციის რისკს ქმნიდა.

აშშ-ის სამხედრო და სადაზვერვო უწყებებში ხელოვნური ინტელექტის გამოყენების თითქმის ყველა მიმართულებით დანერგვის მცდელობები მიმდინარეობს, დაწყებული აშშ-ის მიერ მოპოვებული უზარმაზარი მოცულობის სადაზვერვო ინფორმაციის ანალიზითა და დარტყმების სამიზნეების შერჩევით, დამთავრებული შედარებით რუტინული ამოცანებით, როგორიცაა ბიუჯეტის მართვა, ლოგისტიკა და მომარაგების ჯაჭვების მართვა, წერს ტელეარხი.

თუმცა, აღნიშნული შემთხვევა ცხადყოფს, თუ რამდენად სერიოზული რისკები ახლავს ამ ახალი, ძლიერი და ჯერ კიდევ შედარებით ნაკლებად შესწავლილი ტექნოლოგიის გამოყენებას ომის დროს სამიზნეების განსაზღვრისთვის. ანალიტიკოსები დიდი ხანია შიშობენ, რომ ხელოვნურმა ინტელექტმა შესაძლოა კატასტროფული შეცდომა გამოიწვიოს, თუ სახელმწიფოები არასანდო მონაცემებს დაეყრდნობიან. ასეთმა შეცდომამ, მაგალითად, შესაძლოა აშშ-ს არაზუსტი ინფორმაციის საფუძველზე ჩინურ გემზე ცეცხლის გახსნამდე მიიყვანოს.

ამ კონკრეტულ შემთხვევაში ანალიტიკოსმა ჩატბოტს მიმართა გემის მანიფესტის შესახებ არსებული სადაზვერვო ინფორმაციის დასამუშავებლად. ინფორმაცია აშშ-ის სპეციალური ოპერაციების სარდლობის წყნარი ოკეანის მიმართულებიდან, ჰავაიზე განთავსებული სტრუქტურიდან, მოდიოდა. უცნობია, კომერციულად ხელმისაწვდომ ჩატბოტს იყენებდა ანალიტიკოსი თუ აშშ-ის მთავრობის მიერ შექმნილ სისტემას.

„შიდა ინსტრუმენტები ძირითადად კომერციული სისტემების ასლებია, რომლებსაც უბრალოდ გარეგნობა აქვთ შეცვლილი“, - განაცხადა აშშ-ის ყოფილმა მაღალჩინოსანმა, რომელიც სამხედრო და სადაზვერვო ანალიტიკოსების მიერ გამოყენებულ ხელოვნური ინტელექტის სისტემებს იცნობს.

ჩატბოტმა ღია წყაროებიდან მოპოვებული ინფორმაცია მთავრობის ხელთ არსებულ საიდუმლო ელექტრონულ სადაზვერვო მონაცემებთან გააერთიანა და საბოლოოდ გემის ტვირთის შესახებ მცდარი დასკვნა გამოიტანა.

შემდეგ ანალიტიკოსმა ხელოვნური ინტელექტი კიდევ ერთხელ გამოიყენა, რათა მიღებული დასკვნები სტანდარტულ სადაზვერვო ანგარიშად გადაექცია - ისეთ დოკუმენტად, რომელსაც სამხედრო მაღალჩინოსნები ენდობიან - და ანგარიში შესაბამის უწყებებში გაავრცელა.

ხელოვნური ინტელექტის სწრაფი დანერგვის მიზეზად სამხედროები ასახელებენ მის შესაძლებლობას, უფრო სწრაფად მიიღონ ბრძოლის ველზე გადაწყვეტილებები, მაგალითად, განსაზღვრონ, რომელ სამიზნეებს დაარტყან ან სად გადაიყვანონ სამხედრო ტექნიკა და სხვა რესურსები. ოფიციალური პირების განცხადებით, აშშ ვერ დაუშვებს, რომ ხელოვნური ინტელექტის ინტეგრაციის თვალსაზრისით ჩამორჩეს, განსაკუთრებით იმ შემთხვევაში, თუ მომავალში ჩინეთთან ან სხვა მოწინააღმდეგესთან ბრძოლა მოუწევს, რომელიც შესაძლოა აშშ-ზე ერთი ნაბიჯით წინ იყოს.