Reuters: პუტინის მთავარი ეკონომიკური წარმომადგენელი და პარტია „ალტერნატივა გერმანიისთვის“ ლიდერები მომავალი წლისთვის შეხვედრას გეგმავენ, სადაც ევროპის უდიდეს ეკონომიკაში რუსული ბუნებრივი აირის მიწოდების შესაძლო აღდგენას განიხილავენ

რუსეთის პრეზიდენტის, ვლადიმირ პუტინის მთავარი ეკონომიკური წარმომადგენელი და პარტია „ალტერნატივა გერმანიისთვის“ (AfD) ლიდერები მომავალი წლისთვის შეხვედრას გეგმავენ, სადაც ევროპის უდიდეს ეკონომიკაში რუსული ბუნებრივი აირის მიწოდების შესაძლო აღდგენას განიხილავენ. ამის შესახებ ინფორმაციას სააგენტო Reuters-ი ორ წყაროზე დაყრდნობით ავრცელებს.

წყაროს ცნობით, შეხვედრას პუტინის ახლო მრჩეველი და რუსეთის სუვერენული სიმდიდრის ფონდის ხელმძღვანელი, კირილ დმიტრიევი, ასევე AfD-ის თანათავმჯდომარეები - ალის ვაიდელი და ტინო ხრუპალა დაესწრებიან. AfD-ის პრესსპიკერმა და დმიტრიევის წარმომადგენელმა აღნიშნულ საკითხზე კომენტარის გაკეთებაზე უარი განაცხადეს.

2022 წელს უკრაინაში რუსეთის სრულმასშტაბური შეჭრის გამო დაწესებულ სანქციებამდე, რუსეთი უზრუნველყოფდა გერმანიის ნავთობის იმპორტის მესამედზე მეტს და ბუნებრივი აირის ნახევარზე მეტს.

გავრცელებული ინფორმაციით, შეხვედრა მხოლოდ იმ შემთხვევაში შედგება, თუ რუსეთსა და უკრაინას შორის ჯერ სამშვიდობო ჩარჩო შეთანხმება მიიღწევა.