მაკრონი: რუსეთის მიზანი ჩვენი დაშინება და უკრაინელების მხარდაჭერის პროცესის ჩაშლაა, თუმცა შედეგი საპირისპირო იქნება - ჩვენ ვერ დაგვაშინებენ, რადგან ვიცით, რომ უკრაინაში წყდება ჩვენი დღევანდელი და ხვალინდელი უსაფრთხოების ბედი

საფრანგეთის პრეზიდენტმა, ემანუელ მაკრონმა ელისეს სასახლეში გამართული შეხვედრის შემდეგ განაცხადა, რომ ევროპაში რუსეთის მხრიდან მომდინარე ჰიბრიდული საფრთხეების ფონზე შექმნილი ვითარება „სერიოზულია“ და მოითხოვს განსაკუთრებულ „სიფხიზლეს“.

მაკრონმა ყურადღება გაამახვილა გერმანიაში, ლაიფციგის აეროპორტში დრონით თავდასხმის მცდელობასა და პოლონეთის პრემიერ-მინისტრის, დონალდ ტუსკის განცხადებებზე, რომლის მიხედვითაც მოსკოვმა შესაძლოა ევროპაში უკრაინის მოკავშირეების წინააღმდეგ ჰიბრიდული დარტყმები განახორციელოს.

„მათი მიზანი ჩვენი დაშინება და უკრაინელების მხარდაჭერის პროცესის ჩაშლაა, თუმცა შედეგი საპირისპირო იქნება. ჩვენ ვერ დაგვაშინებენ, რადგან ვიცით, რომ უკრაინაში წყდება ჩვენი დღევანდელი და ხვალინდელი უსაფრთხოების ბედი“, - აღნიშნა საფრანგეთის პრეზიდენტმა.

შესაძლო საპასუხო ზომებთან დაკავშირებით მაკრონმა ხაზგასმით აღნიშნა, რომ შეკავების პოლიტიკის არსი სწორედ იმაში მდგომარეობს, რომ წინასწარ არ გახდეს ცნობილი კონკრეტული ნაბიჯები, თუმცა მოსკოვის ქმედებები უპასუხოდ არ დარჩება: „ვფიქრობ, რუსეთის მხრიდან დიდი შეცდომა იქნება ევროპელების მიმართ ამგვარი ქმედებების გაგრძელება“.