Euronews: ევროპის საგარეო ურთიერთობათა საბჭოს (CFR) ახალი კვლევა აჩვენებს, რომ ევროპელების უმეტესობას კვლავ სურს უფრო ძლიერი და ერთიანი ევროპა, თუმცა ამის მიღწევადობაში ეჭვი ეპარება - გამოკითხულთა დაახლოებით 68% განახლების ნაცვლად რეგრესის ნიშნებს ხედავს

ევროპის საგარეო ურთიერთობათა საბჭოს (CFR) ახალი კვლევა აჩვენებს, რომ ევროპელების უმეტესობას კვლავ სურს უფრო ძლიერი და ერთიანი ევროპა, თუმცა ამის მიღწევადობაში ეჭვი ეპარება - გამოკითხულთა დაახლოებით 68% განახლების ნაცვლად რეგრესის ნიშნებს ხედავს, - წერს Euronews-ი.

ევროპის საგარეო ურთიერთობათა საბჭოსა (ECFR) და ევროპის კულტურის ფონდის (ECF) მიერ გამოქვეყნებული ახალი კვლევა მიუთითებს, რომ ნდობის კრიზისი რეალურია.

ავტორები მას „წარმოსახვის დეფიციტს“ უწოდებენ: ევროპელთა უმრავლესობას კვლავ სურს უფრო ძლიერი და ერთიანი კონტინენტი, თუმცა უმეტესობას ეჭვი ეპარება, რომ ეს მიზანი ოდესმე მიიღწევა.

ექვს ქვეყანაში ჩატარებულ თითქმის 6 000 ინტერვიუზე დაფუძნებული კვლევის შედეგები აჩვენებს, რომ საზოგადოებას ევროპულ პროექტზე უარი არ უთქვამს, თუმცა დიდწილად დაკარგული აქვს მისი წარმატებით განხორციელების რწმენა.

საშუალოდ, გამოკითხულთა 68% ევროპის ამჟამინდელ მდგომარეობას „ზოგადი გაუარესებით ან ნორმალურობის დაკარგვით“ ახასიათებს.

მხოლოდ 12% აღიქვამს მას, როგორც „გამოფხიზლებისა თუ აღორძინების“ პერიოდს. პესიმიზმის დონე ქვეყნების მიხედვით განსხვავდება: ყველაზე მაღალი მაჩვენებელი საფრანგეთში ფიქსირდება (80%-ზე მეტი), ხოლო შედარებით დაბალი - გაერთიანებულ სამეფოში, სადაც ის მაინც უმრავლესობას მოიცავს, თუმცა უფრო მცირე ზღვრით.

ევროპის უდიდესი გამოწვევების დასახელებისას, სიაში 43%-ით პირველი ადგილი ომმა და უსაფრთხოებამ დაიკავა. ეს მაჩვენებელი 47%-მდე იზრდება პოლონეთსა და გაერთიანებულ სამეფოში, სადაც ევროპის საზღვრებთან მიმდინარე ომი და მისი შედეგები ყველაზე მძიმედ აისახება საზოგადოებრივ აზრზე.

მეორე ადგილზე ეკონომიკური წნეხია (33%), თუმცა მისი აღქმა ქვეყნების მიხედვით საგრძნობლად განსხვავდება: თუ იტალიაში მას მთავარ პრობლემად 41% ასახელებს, პოლონეთსა და ნიდერლანდებში ეს მაჩვენებელი გაცილებით დაბალია - 23%.

რა პრობლემაც არ უნდა დასახელდეს, ევროპის საპასუხო ნაბიჯებზე საზოგადოების შეფასება მკაცრია: 74% მიიჩნევს, რომ ბლოკი გამოწვევებს ცუდად ართმევს თავს, ხოლო 56%-ს სჯერა, რომ მისი მომავალი რეალურად „საფრთხეშია“ - იმ 21%-ის საპირისპიროდ, ვინც ამ მოსაზრებას არ ეთანხმება.

პესიმიზმის მიუხედავად, კვლევა აჩვენებს, რომ უკან დახევის სურვილი ნაკლებად არსებობს. გამოკითხულთა დაახლოებით 73% კვლავ ინარჩუნებს იმას, რასაც მკვლევრები ევროპის მომავლის „პოზიტიურ ხედვას“ უწოდებენ - ნეგატიური განწყობის მქონე 14%-ისა და იმ 13%-ის საპირისპიროდ, ვისაც მკაფიო პოზიცია არ გააჩნია.

გამოკითხულთა თითქმის მესამედის (32%) შეფასებით, ევროკავშირი მოქმედებისას მეტისმეტად ნელია. გერმანიასა და ნიდერლანდებში ეს მაჩვენებელი 40%-ს სცდება - ამ ქვეყნებში ეს პრობლემა ადგილობრივი პოლიტიკური დისკუსიების განუყოფელი ნაწილია.

თითქმის იგივე რაოდენობა (30%) ევროკავშირს არათანმიმდევრულობაში ადანაშაულებს და აღნიშნავს, რომ ის საკუთარ დეკლარირებულ ღირებულებებს ვერ პასუხობს.