აშშ-ის ელჩი ნატოში ჩეხეთს თავდაცვის ხარჯების გაზრდისკენ მოუწოდებს

ჩეხეთმა თავდაცვის ხარჯები უნდა გაზარდოს, რათა ნატოს მიერ განსაზღვრულ მიზნებს მიაღწიოს, - განაცხადა ნატოში აშშ-ის ელჩმა მეთიუ უიტაკერმა.

როგორც Reuters-ი იუწყება, ჩეხეთს, რომელსაც ბოლო წლებში ხელისუფლებაში მყოფმა სხვადასხვა მთავრობამ ნატოს მიერ განსაზღვრული თავდაცვის ხარჯების მინიმალური, 2%-იანი ზღვრისთვისაც კი ვერ მიაღწია, მიმდინარე წელსაც არ აქვს ამ მაჩვენებლის შესრულების შესაძლებლობა. 2%-იან ნიშნულს ქვეყანა 2027 წელს მიაღწევს.

ამასთან, ჩეხეთს არ აქვს მკაფიო გეგმა ნატოს მიერ 2035 წლისთვის განსაზღვრული თავდაცვის ხარჯების 3,5%-მდე გაზრდის მიმართულებით.

„იმედგამაცრუებელია იმის ხილვა, რომ ჩეხეთმა ჰააგის თავდაცვის ვალდებულების შესრულების მიმართულებით უფრო მეტი პროგრესი ვერ აჩვენა. სამწუხაროდ, თავდაცვის ხარჯების თვალსაზრისით, ჩეხეთი ალიანსის ქვეყნებს შორის ბოლო პოზიციებისკენ მიემართება. მან თავდაცვის ხარჯების გაზრდის ვალდებულება უნდა შეინარჩუნოს. ეს არის გზავნილი, რომელიც ჩეხეთში ჩვენს მეგობრებს გუშინ და დღეს, პირადად, გადავეცი“, - აღნიშნა აშშ-ის ელჩმა ნატოში.

მისი თქმით, შეერთებული შტატები კვლავ ერთგულია ნატოსა და ალიანსის წევრი ქვეყნების ტერიტორიის დაცვის მიმართ.

„თუმცა, ჩვენ ველით, რომ ჩვენი მოკავშირეები უფრო მეტ ძალისხმევას გამოიჩენენ“, - განაცხადა უიტაკერმა.

ჩეხეთის მთავრობამ პოპულისტი პრემიერ-მინისტრის ანდრეი ბაბიშის ხელმძღვანელობით, რომელიც 2025 წლის ბოლოს ხელისუფლებაში დაბრუნდა, მიმდინარე წლისთვის თავდაცვის ხარჯები წინა მთავრობის მიერ დაგეგმილ მაჩვენებელთან შედარებით შეამცირა და ქვეყნის მთლიანი შიდა პროდუქტის დაახლოებით 1,7 - 1,8%-ით განსაზღვრა. მომავალ წელს კი ჩეხეთი თავდაცვისთვის მშპ-ის 2%-ის დახარჯვას გეგმავს.

ბაბიშის განცხადებით, ქვეყანას ინფრასტრუქტურისა და საავადმყოფოების მშენებლობისთვის ფინანსური რესურსები სჭირდება, რის გამოც თავდაცვისთვის თანხების გამოყოფის შესაძლებლობები შეზღუდულია.