რუსეთში საპარლამენტო არჩევნები მიმდინარეობს

რუსეთში სახელმწიფო სათათბიროს არჩევნები მიმდინარეობს. ინფორმაციას რუსული მედია ავრცელებს.

საარჩევნო უბნები ქვეყნის მასშტაბით დღეს გაიხსნა. არჩევნები 20 სექტემბრის ჩათვლით ჩატარდება. საარჩევნო უბნები გახსნილია რუსეთის მიერ ოკუპირებულ დონბასში, ხერსონის და ზაპოროჟიეს ოლქებსა და ყირიმში.

საპარლამენტო არჩევნებში 10 პარტია მონაწილეობს, მათ შორისაა მმართველი „ერთიანი რუსეთის“ პოლიტიკური გაერთიანება.

საკუთარი არჩევანი დისტანციურად უკვე დააფიქსირეს რუსეთის პრეზიდენტმა ვლადიმერ პუტინმა, პრემიერ-მინისტრმა მიხეილ მიშუსტინმა, საგარეო საქმეთა მინისტრმა სერგეი ლავროვმა და რუსეთის უშიშროების საბჭოს თავმჯდომარის მოადგილემ, ყოფილმა პრეზიდენტმა დიმიტრი მედვედევმა.