რობერტ ფიცო: ევროპაში ფართომასშტაბიანი სამხედრო კონფლიქტის შესაძლებლობის თვალსაზრისით ვითარება არასდროს ყოფილა ისეთი სერიოზული და დაძაბული, როგორიც ახლაა

სლოვაკეთის პრემიერ-მინისტრ რობერტ ფიცოს განცხადებით, ევროპაში ფართომასშტაბიანი სამხედრო კონფლიქტის შესაძლებლობის თვალსაზრისით ვითარება არასდროს ყოფილა ისეთი სერიოზული და დაძაბული, როგორიც ახლაა. ფიცომ ასევე აღნიშნა, რომ არ სურს, სლოვაკეთი რაიმე ომში ჩაერთოს.

ფიცომ ამის შესახებ ჩრდილოატლანტიკური ალიანსის ხელშეკრულების მე-5 მუხლის კონტექსტში ისაუბრა, რომლის თანახმადაც, ნატოს ერთი წევრის წინააღმდეგ შეიარაღებული თავდასხმა ყველა წევრის წინააღმდეგ თავდასხმად მიიჩნევა.

„დიახ, ჩვენ ნატოს წევრები ვართ, ამას ვაფასებთ და მზად ვართ, ვითანამშრომლოთ და შევასრულოთ ჩვენი ვალდებულებები. მაგრამ, როგორც პრემიერ-მინისტრი, ყველაფერს გავაკეთებ იმისთვის, რომ სლოვაკეთი არასდროს აღმოჩნდეს შეიარაღებულ კონფლიქტში ჩათრეული“, - განაცხადა ფიცომ.

მან შეშფოთება გამოთქვა, რომ ევროპა „ზღვარზეა“ და აღნიშნა, რომ ვერ წარმოუდგენია, რა მოხდება სლოვაკეთში, თუ ქვეყანა ომის შედეგად გამოწვეული პრობლემების წინაშე აღმოჩნდება.

„რაც დღეს ევროპაში ხდება, რასაც ვისმენთ და ვხედავთ, არის ის, რომ უკრაინაში სამხედრო კონფლიქტი კონტროლიდან გამოვიდა. სამხედრო ოპერაციების მარეგულირებელი ყველა წესი მიტოვებულია და თავდასხმების სამიზნე სამოქალაქო ინფრასტრუქტურაც ხდება. ვფიქრობ, უკრაინის ტერიტორიაზე ფართომასშტაბიანი სამხედრო ოპერაციების მომსწრენი გავხდებით. თუმცა, ყველაზე მეტად ის მაშინებს, თუ რამდენად გაძლიერდა ევროპაში სამხედრო რიტორიკა. როგორც ჩანს, ევროკავშირის 2028-2034 წლების ბიუჯეტიდან გამარჯვებულები იარაღის მწარმოებელი კომპანიები იქნებიან. არა მოქალაქეები, არამედ იარაღის მწარმოებლები“, - განაცხადა ფიცომ.

როგორც სლოვაკეთის პრემიერმა სტუდენტებთან შეხვედრაზე აღნიშნა, ის უკრაინაში მიემგზავრება და იმედი აქვს, რომ კიევიდან ის მეტად ოპტიმისტური დაბრუნდება.

„იმედი მაქვს, რომ ხვალ საღამოს, უკრაინიდან დაბრუნების შემდეგ, ისეთი სკეპტიკურად განწყობილი აღარ ვიქნები, როგორიც ახლა ვარ. გასულ კვირას ბრატისლავაში ვიშეგრადის ოთხეულის პრემიერ-მინისტრების შეხვედრის შემდეგ ღამე ვერ დავიძინე. მოვისმინე რას ამბობდნენ პოლონეთის, უნგრეთისა და ჩეხეთის პრემიერ-მინისტრები, ასევე ირლანდიის პრემიერ-მინისტრი, რომელიც შეხვედრას ევროკავშირის საბჭოს თავმჯდომარე ქვეყნის წარმომადგენლის რანგში ესწრებოდა. ამ ყველაფრის მოსმენის შემდეგ თავი კარგად არ მიგრძნია“, - განაცხადა ფიცომ.

მან სტუდენტებთან საუბრისას ასევე აღნიშნა, რომ მშვიდობა თავისთავად მოცემულობად არ უნდა მივიჩნიოთ.

„დღეს მშვიდობა გვაქვს, მაგრამ ხვალ შესაძლოა აღარაფერი გვქონდეს. იმედი ვიქონიოთ, რომ ყველაფერი მხოლოდ უკეთესობისკენ შეიცვლება და პოლიტიკის ის „დიდი ბიჭები“, როგორც მე მათ ვუწოდებ, გონს მოეგებიან, რადგან ზოგჯერ ისეთი შეგრძნება მაქვს, რომ ისინი კარგავენ კავშირს რეალობასთან და კონტროლს იმაზე, რაც დღეს მსოფლიოში ხდება“, - განაცხადა ფიცომ.