The Economist: ოქტომბრისთვის რუსმა ოკუპანტებმა შესაძლოა კიევში „ნამდვილი ჯოჯოხეთი“ დაატრიალონ

რუსი ოკუპანტები განაგრძობენ მასშტაბურ იერიშებს კიევსა და უკრაინის სხვა ქალაქებზე. ბრიტანული გამოცემა The Economist-ის ცნობით, არსებობს საფრთხე, რომ ოქტომბრამდე დედაქალაქში სურსათის, წყლის მიწოდებისა და კანალიზაციის სისტემების მუშაობა მწყობრიდან გამოვიდეს.

დასავლელმა დიპლომატმა ჟურნალისტებს განუცხადა, რომ კიევი შესაძლოა „დაეცეს“ უკვე ამ წელს. უკრაინელმა ოფიციალურმა პირმა კი მათთან საუბარში დასძინა, რომ ოქტომბრისთვის „სრულ ჯოჯოხეთს“ ელის.

„ისინი კიევს დაუღალავად შეუტევენ. ისინი გამოიყენებენ დაღლილობას, გამოფიტვასა და სხვა ფაქტორებს, რათა ტრაგედია გამოიწვიონ“, - განაცხადა უკრაინელმა ოფიციალურმა პირმა.

გამოცემა აღნიშნავს, რომ კიევში, საჰაერო განგაშის დროს, მაღაზიები დღეში რამდენჯერმე იხურება, საზოგადოებრივი ტრანსპორტის გაჩერება კი მგზავრებს უმძიმეს მდგომარეობაში აყენებს. სკოლები ბავშვებს სახლებში უშვებენ, რაც მშობლებს აიძულებს, შვილების უკრაინის დასავლეთ რეგიონებში ან სულაც საზღვარგარეთ გაგზავნაზე იფიქრონ.

ჟურნალისტების თქმით, თითოეული წასული ოჯახი ამცირებს საგადასახადო ბაზასა და სამუშაო ძალას. ეს რესურსები ისედაც გამოფიტულია იმ დაახლოებით მილიონი ადამიანით, რომლებიც ჯარში მსახურობენ, და დაახლოებით იმავე რაოდენობის მოქალაქით, რომლებიც გაწვევისგან თავის არიდებას ცდილობენ.

გარდა ამისა, დიპლომატიამ საბრძოლო მოქმედებების შეჩერება ვერ შეძლო. გამოცემის წყაროების ცნობით, მოსკოვსა და კიევში ვიზიტისას, აშშ-ის პრეზიდენტის სპეციალურმა წარმომადგენლებმა, სტივ უიტკოფმა და ჯარედ კუშნერმა რუსულ და უკრაინულ მხარეებთან შეზღუდული ტექნიკური შეთანხმების წინადადება განიხილეს.

გამოცემა ასევე აღნიშნავს, რომ აშშ-ის პრეზიდენტი, დონალდ ტრამპი დიზელის საწვავზე მსოფლიო ფასების მატებას უკრაინის მიერ რუსეთზე განხორციელებულ იერიშებს აბრალებს. მოლაპარაკებების ფანჯარა კი შესაძლოა 20 სექტემბერს რუსეთში დაგეგმილი სახელმწიფო დუმის არჩევნების შემდეგ და ნოემბერში, აშშ-ის შუალედურ არჩევნებამდე გაიხსნას.

გამოცემის წყაროების ცნობით, ტრამპმა შესაძლოა ამომრჩევლების წინაშე თავი მოიწონოს შავი ზღვის შესახებ შეთანხმების მიღწევით, რაც გზას გაუხსნის რუსული ნავთობის ბლოკირებულ ექსპორტსა და მარცვლეულის გატანას როგორც რუსეთიდან, ისე უკრაინიდან. აშშ-ის, რუსეთისა და უკრაინის მონაწილეობით სამმხრივი მოლაპარაკებები კი შესაძლოა ოქტომბრის დასაწყისში აბუ-დაბიში გაიმართოს.

ასევე, უკრაინელმა ოფიციალურმა პირმა ჟურნალისტებთან საუბარში აღნიშნა, რომ არ არსებობს არანაირი პერსპექტივა იმისა, რომ აშშ-მა სრულად პრორუსული დარეგულირება მოითხოვოს. თუმცა, მისივე თქმით, ილუზია იქნება უფრო ფართო ზავის ან ცეცხლის შეწყვეტის იმედი. მან ხაზგასმით აღნიშნა, რომ პუტინი მომავალ გაზაფხულამდე შეტევის შეჩერებას არ დათანხმდება.