ტუსკი: დაზვერვის ცნობების თანახმად, რუსეთის გეგმაში ასევე შედის ჰიბრიდული თავდასხმები დრონებითა და რაკეტებით იმ ქვეყნების წინააღმდეგ, რომლებიც უკრაინას მხარს უჭერენ, მათ შორის პოლონეთზეც

პოლონეთის პრემიერ-მინისტრმა, დონალდ ტუსკმა განაცხადა, რომ უკრაინის ომთან დაკავშირებით რუსეთის გეგმა იმ ქვეყნების წინააღმდეგ დრონებისა და რაკეტების გაშვებას ითვალისწინებს, რომლებიც უკრაინას მხარს უჭერენ.

ტუსკმა აღნიშნა, რომ მისი განცხადება დაზვერვის სამსახურების ინფორმაციას ეფუძნება, თუმცა არ დაუკონკრეტებია, თუ რომელ უწყებაზე იყო საუბარი.

„რუსეთმა ომის ახალი სტრატეგიის შემუშავება გადაწყვიტა. პირველ რიგში, ამ ეტაპზე რუსეთის მიზანია, რაც შეიძლება მასშტაბურად გაანადგუროს უკრაინის ეკონომიკა და ლოგისტიკა. იგეგმება ძალიან მაღალი სიხშირისა და ინტენსივობის უწყვეტი თავდასხმები უკრაინის ექვს მსხვილ ქალაქზე“, - განაცხადა პოლონეთის პრემიერ-მინისტრმა.

„დაზვერვის ცნობების თანახმად, რუსეთის გეგმაში ასევე შედის ჰიბრიდული თავდასხმები დრონებითა და რაკეტებით იმ ქვეყნების წინააღმდეგ, რომლებიც უკრაინას მხარს უჭერენ, მათ შორის პოლონეთზეც. ამ შესაძლებლობებზე დიდი ხანია საუბრობენ. დღეს ეს ინფორმაცია ძალიან თანმიმდევრული და, სამწუხაროდ, დამაჯერებელია“, - აღნიშნა ტუსკმა.

„ანალიზის მიხედვით, რუსეთის გეგმაა გაანადგუროს საავტომობილო და სარკინიგზო სასაზღვრო პუნქტები უკრაინის მხარეს და, შესაძლოა, პოლონეთის ან მოლდოვის მხარესაც. ეს ნიშნავს, მაგალითად, იმას, რომ როდესაც უკრაინის ენერგეტიკული ინფრასტრუქტურა განადგურდება, ჩვენი ქმედებები (...) ვეღარ განხორციელდება, რადგან აღარ იარსებებს სასაზღვრო პუნქტები და არანაირი ლოგისტიკური შესაძლებლობა“, - განაგრძო მან.

პოლონელმა ლიდერმა ასევე განმარტა, რომ თავდასხმები ისე განხორციელდება, რომ „შემთხვევითი“ გამოჩნდეს, რათა შემცირდეს ნატოს წევრი ქვეყნების მოტივაცია, გამოიყენონ ალიანსის რეგულაციები რომელიმე წევრ სახელმწიფოზე აგრესიის შემთხვევაში.