The Guardian: ტრამპი კანადისთვის ევროკავშირის ასოცირებული წევრობის შეთავაზებას „სასაცილოს“ უწოდებს და ბრიუსელს ტარიფებით ემუქრება

აშშ-ის პრეზიდენტი დონალდ ტრამპი ევროკავშირს „სერიოზული ტარიფებითა და სავაჭრო ურთიერთობების შეწყვეტით“ დაემუქრა მას შემდეგ, რაც ევროკავშირმა კანადას ბლოკის პირველი ასოცირებული წევრობა შესთავაზა. მან ინიციატივას „სასაცილო“ უწოდა, იუწყება The Guardian-ი.

აშშ-ის პრეზიდენტმა ჟურნალისტებთან საუბრისას განაცხადა, რომ ევროკავშირის ნაბიჯი შესაძლოა „მტრულ აქტად“ ჩაითვალოს და ვაშინგტონმა ევროპასთან ვაჭრობის შეზღუდვა ან „ძალიან სერიოზული ტარიფების“ დაწესება განიხილოს.

„თუ ეს კარგი განზრახვით კეთდება, მაშინ პრობლემა არ არის. თუ ცუდი განზრახვა აქვს, ევროპას ძალიან მძიმე ტარიფებს დავუწესებთ“, - განაცხადა ტრამპმა.

ევროკომისიის პრეზიდენტმა ურსულა ფონ დერ ლაიენმა კანადას ევროკავშირის პირველი „ასოცირებული წევრობა“ გუშინ შესთავაზა, ერთი დღით ადრე, ვიდრე კანადის პრემიერ-მინისტრი მარკ კარნი ევროპარლამენტში სიტყვით გამოვიდოდა.

ფონ დერ ლაიენმა კარნისთან ტექნოლოგიების, თავდაცვისა და ენერგეტიკის სფეროებში თანამშრომლობის გაღრმავებაზე ისაუბრა. ევროპარლამენტში გამოსვლისას მან განაცხადა, რომ დემოკრატიები „საერთაშორისო წესებზე დაფუძნებული სისტემის რღვევის“ წინაშე დგანან და ამ პირობებში ბრიუსელსა და ოტავას შორის ურთიერთობების გაღრმავება აუცილებელია.

როგორც The Guardian-ი წერს, კანადასა და ევროკავშირს უკვე აქვთ სავაჭრო შეთანხმება და არაერთი ორმხრივი თანამშრომლობის დოკუმენტი, თუმცა, დონალდ ტრამპის თეთრ სახლში დაბრუნებისა და ვაშინგტონის მიერ ტრადიციული მოკავშირეებისთვის ტარიფების გაზრდის შემდეგ ისინი კიდევ უფრო დაახლოვდნენ. ტრამპი არაერთხელ საუბრობდა კანადის აშშ-ის 51-ე შტატად ქცევაზე და მწვავედ აკრიტიკებდა ევროკავშირს.

თავდაცვის სფეროში თანამშრომლობის გაფართოებას და შეერთებულ შტატებზე დამოკიდებულების შესამცირებლად კანადის პრემიერის მარკ კარნის ოფისმა გუშინ განაცხადა, რომ ქვეყანამ ოფიციალურად შეიტანა განაცხადი ბრიტანეთის ხელმძღვანელობით მოქმედ გაერთიანებულ საექსპედიციო ძალებში (JEF) გაწევრიანებაზე.

გაერთიანებული საექსპედიციო ძალები სწრაფი რეაგირების სამხედრო პარტნიორობაა, რომელშიც ნატოს 10 წევრი ქვეყანა შედის, მათ შორის დანია, ნიდერლანდები, ნორვეგია და შვედეთი.