უკრაინული მედია: რუსული თავდასხმის შედეგად, კიევში ელენა ზელენსკის ჰუმანიტარული ფონდის საწყობი სრულად განადგურდა

დღეს დილით, რუსული თავდასხმის შედეგად, კიევში ელენა ზელენსკის ფონდის საწყობი სრულად განადგურდა. ამის შესახებ ორგანიზაციამ საკუთარ Facebook-გვერდზე განაცხადა.

„ის სრულად დაიწვა. ყველაზე მნიშვნელოვანი კი ის არის, რომ ადამიანებიდან არავინ დაშავებულა“, - ნათქვამია გავრცელებულ ინფორმაციაში.

როგორც ცნობილია, საწყობში ინახებოდა ჰუმანიტარული დახმარება, რომელსაც ფონდი პარტნიორებისგან ყიდულობდა და იღებდა, რათა შემდგომში უკრაინის სხვადასხვა რეგიონში მყოფი ბავშვებისთვის, ოჯახებისა და დაწესებულებებისთვის გადაეცათ.

„განადგურებულ ნივთებს შორის არის გენერატორები, საყოფაცხოვრებო ტექნიკა, ნოუთბუქები, პლანშეტები, ელექტრონული წიგნები, სამედიცინო აღჭურვილობა და მრავალი სხვა. მთელ ამ დახმარებას კონკრეტული დანიშნულება ჰქონდა: ხელი შეეწყო ბავშვების სწავლისთვის, საგანმანათლებლო დაწესებულებებისა და საავადმყოფოების ფუნქციონირებისთვის, ასევე დახმარებოდა ოჯახებს უკრაინის სხვადასხვა კუთხეში“, - განაცხადეს ფონდში.

ამასთანავე, ორგანიზაციაში აღნიშნავენ, რომ საწყობის განადგურების გამო დახმარების ნაწილის მიწოდება, შესაძლოა, დაგეგმილზე გვიან მოხდეს.

უწყების ცნობით, გუნდი უკვე მუშაობს ლოგისტიკის გადაწყობაზე, რათა საჭირო დახმარება რაც შეიძლება სწრაფად მიაწოდონ მათ, ვისთვისაც ის იყო განკუთვნილი.