უკრაინის საგარეო საქმეთა სამინისტროს სპიკერმა განაცხადა, რომ რუსი ბიზნესმენების, ალიშერ უსმანოვისა და მიხაილ ფრიდმანის მიმართ სანქციების შემსუბუქება მიუღებელია

უკრაინის საგარეო საქმეთა სამინისტროს სპიკერმა, გეორგი ტიხიმ განაცხადა, რომ რუსი ბიზნესმენების, ალიშერ უსმანოვისა და მიხაილ ფრიდმანის მიმართ სანქციების შემსუბუქება მიუღებელია.

საგარეო უწყებაში ხაზს უსვამენ - უკრაინის პოზიცია უცვლელია, სანქციების სია უნდა გაფართოვდეს და არა შემცირდეს.

„ევროკავშირის ინდივიდუალურ სანქციების სიაში შეყვანილი ადამიანები იქ უბრალოდ ისე, ვინმეს სურვილის გამო არ მოხვედრილან. ისინი არიან პირები, რომლებიც უშუალოდ უჭერენ მხარს რუსეთის აგრესიას უკრაინის წინააღმდეგ და ხელს უწყობენ ამ ომის გაგრძელებას. ამიტომ, ისინი სანქციების სიაში უნდა დარჩნენ. ეს სია უნდა გაფართოვდეს მეტი სახელის ჩამატებით და უკვე უნდა გადავიდეთ მისი განახლების ექვსთვიანი ინტერვალიდან 12-თვიანზე“, - განაცხადა ტიხიმ.

სამინისტროს სპიკერმა ასევე აღნიშნა, რომ უსმანოვისა და ფრიდმანის წინააღმდეგ ევროპული სანქციების გაგრძელების განხილვა ერთი კვირით გადავადდა, თუმცა უწყებაში მიაჩნიათ, რომ „განსახილველი არაფერია“.

„საჭიროა ყველა მოქმედი სანქციების რეჟიმის გაგრძელება და მათი გაძლიერება, და არა შემსუბუქება. რადგან ეს ქმნის რუსეთის ფედერაციის წინააღმდეგ სანქციების შემსუბუქების ძალიან სახიფათო პრეცედენტს“, - თქვა ტიხიმ.

11 სექტემბერს ევროკავშირის ქვეყნების ელჩებმა კვლავ ვერ შეძლეს რუსეთის აგრესიის გამო დაწესებული პერსონალური სანქციების გაგრძელებაზე შეთანხმება, სლოვაკეთისა და საფრანგეთის მოთხოვნის გამო, რომლებიც პერსონალურ სანქციებს დაქვემდებარებულ პირთა სიაში ცვლილებებს ითხოვდნენ.