საფრანგეთის კულტურის ყოფილი მინისტრი კორუფციის ბრალდებით სასამართლოს წინაშე წარდგა

საფრანგეთის კულტურის ყოფილი მინისტრი, რაშიდა დატი პარიზში სასამართლოს წინაშე წარდგა კორუფციის ბრალდებით, რომელიც საავტომობილო ჯგუფ Renault-Nissan-თან გარიგებებს უკავშირდება.

რაშიდა დატის ბრალი ედება უკანონო ლობირებაში, როდესაც მან 900 000 ევროს ოდენობის საადვოკატო ჰონორარი მიიღო ნიდერლანდებში ბაზირებული Renault-Nissan-ის შვილობილი კომპანიისგან იმ პერიოდში, როდესაც ის ევროპარლამენტის წევრი იყო. სასამართლომ უნდა დაადგინოს, რას ემსახურებოდა აღნიშნული თანხა.

დატის იურიდიულმა გუნდმა კორუფციის ყველა ბრალდება უარყო და განაცხადა, რომ ის „ექსკლუზიურად“ იურისტად მუშაობდა Renault-Nissan-ის შვილობილი კომპანიისთვის.

ფრანგი პროკურორები კი ამტკიცებენ, რომ მას ანაზღაურებას საავტომობილო ჯგუფის ინტერესების ლობირებისთვის უხდიდნენ - საქმიანობისთვის, რაც ევროპარლამენტის წევრებისთვის აკრძალულია.

ბრალდების მხარის განცხადებით, არ არსებობს საკმარისი მტკიცებულებები იმისა, რომ დატიმ რაიმე სახის იურიდიული სამუშაო შეასრულა.