Reuters: აშშ-ის ოფიციალური პირები ომანში „ჰუსიტების“ წარმომადგენლებს შეხვდნენ

აშშ-ის ოფიციალური პირები ომანში იემენელი „ჰუსიტების“ წარმომადგენლებს გასულ კვირას, უქმეებზე შეხვდნენ. ინფორმაციას Reuters-ი ხუთ წყაროზე დაყრდნობით ავრცელებს.

შეხვედრა, რომელიც საჯაროდ არ გახმაურებულა, აშშ-ის საელჩოში, მასკატში გაიმართა. სამი წყაროს ცნობით, შეხვედრის ინიციატორი ომანის მთავრობა იყო, რომელიც რეგიონში ხანგრძლივი დროის განმავლობაში შუამავლის როლს ასრულებს.

შეხვედრა გაიმართა რამდენიმე დღეში მას შემდეგ, რაც ირანის მიერ მხარდაჭერილმა „ჰუსიტებმა“, ფართომასშტაბიანი შეტევის შედეგად, წითელი ზღვის სანაპიროს სტრატეგიულ მონაკვეთზე კონტროლი დაამყარეს და საუდის არაბეთის მიერ მხარდაჭერილი ძალები დაამარცხეს.

როგორც Reuters-ი წერს, 2025 წლის მარტში ტრამპის ადმინისტრაციამ „ჰუსიტები“ „უცხოურ ტერორისტულ ორგანიზაციად“ გამოაცხადა, რის შედეგადაც ჯგუფისთვის მხარდაჭერის გაწევა სისხლის სამართლის დანაშაულად განისაზღვრა. თუმცა მას შემდეგ ვაშინგტონი „ჰუსიტებთან“ მოლაპარაკებებს აწარმოებდა და გასული წლის მაისში ცეცხლის შეწყვეტის შეთანხმებას მიაღწია. ამას წინ უძღვოდა „ჰუსიტების“ წინააღმდეგ ორთვიანი ამერიკული სამხედრო ოპერაცია, რომლის მიზანიც წითელ ზღვაში კომერციულ გემებზე თავდასხმების შეჩერება იყო.

აშშ-ის პრეზიდენტმა დონალდ ტრამპმა შაბათს განაცხადა, რომ „ჰუსიტები“ მის ადმინისტრაციას დაუკავშირდნენ და სთხოვეს, აშშ იემენის ომში არ ჩართულიყო. ვიცე-პრეზიდენტმა ჯეი დი ვენსმა ორშაბათს განაცხადა, რომ აშშ-ს „ჰუსიტებთან“ პირდაპირი კონტაქტი აქვს, თუმცა დამატებითი დეტალები არ დაუკონკრეტებია.

ორი წყაროს ინფორმაციით, შეხვედრის დროს, რომელიც კვირას გაიმართა, „ჰუსიტებმა“ ამერიკელ ოფიციალურ პირებს განუცხადეს, რომ აშშ-ის გემებზე თავდასხმას არ გეგმავენ და 2025 წელს აშშ-თან მიღწეული ცეცხლის შეწყვეტის შეთანხმების ერთგულნი რჩებიან.

ერთ-ერთი წყაროს, იემენის მოქალაქის ცნობით, „ჰუსიტებმა“ ასევე განაცხადეს, რომ არ დაესხმებიან ისრაელის გემებს ან კომერციულ ხომალდებს, გარდა იმ გემებისა, რომლებიც საუდის არაბეთს ეკუთვნის.

ორი წყაროს ინფორმაციით, აშშ-ის მხარეს შეხვედრაზე საელჩოს თანამშრომლები წარმოადგენდნენ.

ერთ-ერთი წყაროს ცნობით, „ჰუსიტების“ დელეგაციაში შედიოდა მასკატში მყოფი ჯგუფის მაღალი რანგის წარმომადგენელი მოჰამედ აბდულსალამი, რომელიც აშშ-ის სანქციების ქვეშ იმყოფება. კიდევ ერთმა წყარომ დაადასტურა აბდულსალამის შეხვედრაზე ყოფნა და ასევე დაასახელა ჰუსიტების კიდევ ერთი მაღალი რანგის წარმომადგენელი აბდელმალიქ ალ-აჯირი.

კითხვაზე, შეხვდნენ თუ არა აშშ-ის წარმომადგენლები ომანში ჰუსიტებს, სახელმწიფო დეპარტამენტის წარმომადგენელმა შეხვედრის ფაქტი არ დაადასტურა. მისი თქმით, წითელ ზღვაში ნავიგაციის თავისუფლების დაცვა და ახლო აღმოსავლეთიდან ტერორიზმის გავრცელების აღკვეთა აშშ-ის ძირითადი ინტერესებია.