ფონ დერ ლაიენის განცხადებით, ევროკავშირში 15-წლამდე მოზარდებს სოციალურ ქსელებზე წვდომა შეეზღუდებათ

ევროკომისიის პრეზიდენტის ურსულა ფონ დერ ლაიენის განცხადებით, ევროკომისია ხვალ „ევროკავშირის ბავშვთა აქტის“ წარადგენს, რომელიც ბავშვების დაცვის მიზნით სოციალური ქსელების გამოყენების ეტაპობრივ შეზღუდვას ითვალისწინებს.

ინიციატივის მიხედვით, სოციალური ქსელებით სარგებლობა 13-წლამდე ასაკის მომხმარებლებს აეკრძალებათ, 15-წლამდე მოზარდებისთვის კი წვდომა შეიზღუდება.

„ჩვენ არ უნდა შევეგუოთ დამოკიდებულების გამომწვევ მიზეზებს. არ უნდა შევეგუოთ იმას, რომ ბავშვები სულ უფრო ექსტრემალური შინაარსის კონტენტში იძირებიან. არ უნდა შევეგუოთ იმასაც, რომ გოგონების ფოტოები ხელოვნური ინტელექტის მიერ სექსუალიზებული გამოსახულებების შესაქმნელად გამოიყენებოდეს“, - განაცხადა ევროკომისიის პრეზიდენტმა ევროპარლამენტში სიტყვით გამოსვლისას.

ევროკომისიის პრეზიდენტმა ასევე აღნიშნა, რომ შეიცვლება მტკიცების ტვირთის პრინციპი და ტექნოლოგიურ პლატფორმებს მოუწევთ იმის დამტკიცება, რომ მათი სერვისები მომხმარებლებისთვის, განსაკუთრებით ბავშვებისთვის, უსაფრთხოა.

„ევროპას მოქმედების შესაძლებლობა აქვს. წესებს ჩვენ ვადგენთ და არა დიდი ტექნოლოგიური კომპანიები“, - განაცხადა ფონ დერ ლაიენმა.