Reuters: საუდის არაბეთი მექასთან „ჰუსიტების“ დრონის განადგურების შესახებ იუწყება

საუდის არაბეთის საჰაერო თავდაცვის სისტემებმა მექას სამხრეთით „ჰუსიტების“ დრონი გაანადგურა, სანამ ის წმინდა ქალაქის თავზე აკრძალულ საჰაერო სივრცეში შევიდოდა. ინფორმაციას Reuters-ი ავრცელებს.

საუდის არაბეთის შეიარაღებული ძალების სპიკერის თურქი ალ-მალიკის განცხადებით, დრონი სამშაბათს საღამოს ჩამოაგდეს. მისი თქმით, ეს მექას მიმართულებით „ჰუსიტების“ მიერ განხორციელებული თავდასხმის მცდელობის მეორე შემთხვევაა. პირველი მსგავსი შემთხვევა 2017 წლის ივლისში დაფიქსირდა, როდესაც „ჰუსიტებმა“ ქალაქის მიმართულებით ბალისტიკური რაკეტა გაუშვეს.

მექა ისლამის მიმდევრებისთვის ერთ-ერთი ყველაზე წმინდა ადგილია და ყოველწლიური ჰაჯის მთავარი ცენტრია. საუდის არაბეთის შეიარაღებული ძალების სპიკერის განცხადებით, ქალაქის უსაფრთხოება „წითელი ხაზია“.

„ჰუსიტების“ წარმომადგენლები მექაზე იერიშს უარყოფენ.

საუდის არაბეთზე განხორციელებულმა თავდასხმებმა გავლენა მოახდინა გლობალურ ენერგეტიკულ ბაზრებზე, რომლებიც ისედაც შეერთებულ შტატებსა და ირანს შორის ექვსთვიანი ომის გამო არასტაბილურია. კონფლიქტმა ჰორმუზის სრუტეში საზღვაო გადაზიდვები თითქმის სრულად შეაფერხა, წერს სააგენტო.

Reuters-ის ცნობით, ბოლო დღეებში „ჰუსიტებმა“ კონტროლი დაამყარეს იემენის წითელი ზღვის სანაპიროს გარკვეულ მონაკვეთებზე, რომლებიც ბაბ-ელ-მანდების სრუტესთან ახლოს მდებარეობს. სრუტე მსოფლიოში ერთ-ერთი ყველაზე მნიშვნელოვანი საზღვაო მარშრუტია. შექმნილმა ვითარებამ შესაძლოა საფრთხე შეუქმნას საუდის არაბეთის ნავთობის ექსპორტს, რომელიც ჰორმუზის სრუტეში გადაზიდვების შეფერხების გამო სხვა მარშრუტით ხორციელდება.

„ჰუსიტებმა“ ბოლო ერთი კვირის განმავლობაში საუდის არაბეთზე რამდენიმე მსხვილი თავდასხმის შესახებ განაცხადეს. მათ შორის იყო ორშაბათს განხორციელებული თავდასხმა სამხედრო-საჰაერო ბაზაზე, რომელიც, მათი თქმით, იემენზე განხორციელებული საჰაერო იერიშების საპასუხო მოქმედება იყო. საუდის არაბეთის ხელმძღვანელობით მოქმედი სამხედრო კოალიციის ინფორმაციით, თავდასხმის შედეგად 13 მშვიდობიანი მოქალაქე დაშავდა.