CBS News-მა გამოაქვეყნა ფოტოები, სადაც ჩანს, თუ რა ზიანი მიადგა ახლო აღმოსავლეთში განლაგებულ ამერიკულ ბაზებს ირანის საჰაერო დარტყმების შედეგად

CBS News-მა ექსკლუზიურად მოიპოვა ფოტოები, რომლებზეც პირველად არის ნაჩვენები ახლო აღმოსავლეთში ირანის სარაკეტო და დრონებით თავდასხმის შედეგად დაზიანებული და განადგურებული აშშ-ის სამხედრო ობიექტები.

ფოტოები CBS News-ს მოქმედმა ამერიკელმა სამხედრო მოსამსახურეებმა ანონიმურობის პირობით მიაწოდეს. მათი ვინაობის გამხელა სამხედრო ძალებში მოქმედი მკაცრი მედიაშეზღუდვების გამო ვერ ხერხდება.

„ეს ჩვენი ბაზებისთვის მიყენებული სერიოზული ზიანია, რომლის შესახებაც ამერიკელ საზოგადოებას ინფორმაცია არ მიეწოდება“, - განუცხადა CBS News-ს ახლო აღმოსავლეთში მივლინებულმა ერთ-ერთმა სამხედრო მოსამსახურემ.

ერთ-ერთი ფოტო საუდის არაბეთში, პრინც სულთანის საავიაციო ბაზაზეა გადაღებული და მასზე Boeing E-3 Sentry-ის ოთხძრავიანი თვითმფრინავია აღბეჭდილი, რომელსაც პირდაპირი დარტყმა უკანა ნაწილში აქვს მიღებული. თვითმფრინავს კუდი მოწყვეტილი აქვს, დამწვარი ფიუზელაჟი კი ასევე ატარებდა მბრუნავ რადარს, რომელიც საჰაერო დაზვერვისთვის აუცილებელ ინფორმაციას აგროვებს.

ბაზაზე გადაღებულ სხვა ფოტოებზე ჩანს ნაწილობრივ განადგურებული შენობები და ყაზარმები. მათი დარჩენილი კონსტრუქციები ე.წ. „T-wall“-ის სახელით ცნობილ, დაუზიანებელ ბეტონის კონსტრუქციებს ესაზღვრება. ბეტონის ასეთი კედლები ერთ დროს ყუმბარებისა და ნაღმტყორცნებისგან დაცვის მნიშვნელოვან ობიექტად მიიჩნეოდა, თუმცა საჰაერო თავდასხმის წინააღმდეგ ისინი პრაქტიკულად უძლურები აღმოჩნდნენ.

მსგავსი მძიმე სურათები გადაიღეს ქუვეითში, ბუჰრინგის სამხედრო ბაზაზეც. ეს ტერიტორია აშშ-ის სახმელეთო ძალების, ჯავშანტექნიკისა და გარკვეული ტიპის საჰაერო ტექნიკისთვის მნიშვნელოვანი ლოგისტიკური და საოპერაციო ბაზაა. ის ქუვეითის ქალაქიდან ჩრდილო-დასავლეთით, შორეულ უდაბნოში მდებარეობს.

პენტაგონის გენერალურმა ინსპექტორმა ამ კვირაში ირანთან ომის შესახებ ახალი ანგარიში გამოაქვეყნა, რომლის თანახმადაც, აშშ-ის სამხედრო ძალებმა 3,7 მილიარდ დოლარამდე ღირებულების „ტექნიკის დანაკარგი“ განიცადეს. მათ შორის თითქმის 60 თვითმფრინავია, წერს CBS News-ი.

„ჩვენ ამ ბაზებს ვერ ვიცავთ. უბრალოდ ვუყურებთ, როგორ ნადგურდება ისინი“, - ციტირებს ტელეარხი ერთ-ერთ ამერიკელ სამხედრო მოსამსახურეს.