AP: ტრამპის ადმინისტრაცია ისრაელისთვის 2,8 მილიარდი დოლარის იარაღის მიყიდვას გეგმავს

ტრამპის ადმინისტრაცია ისრაელისთვის 2 000-ფუნტიანი, დაახლოებით 900-კილოგრამიანი, მძიმე ბომბების მიწოდებას გეგმავს. იარაღი 2,8 მილიარდი დოლარის ღირებულების ახალი სამხედრო გარიგების ნაწილია, იუწყება Associated Press-ი.

სააგენტოს ცნობით, მსგავსი ბომბების ღაზაში გამოყენებისას მშვიდობიანი მოსახლეობის მასობრივი მსხვერპლის რისკთან დაკავშირებით შეშფოთების გამო ჯო ბაიდენის ადმინისტრაციამ მათი მიწოდება ორი წლის წინ შეაჩერა.

აშშ-ის ორი ოფიციალური პირისა და კიდევ ერთი პირის ინფორმაციით, რომელიც გეგმას იცნობს, გარიგება 40 000 ბომბს მოიცავს, მათ შორის 20 000 Mk84-სა და 20 000 BLU-117-ს. გარიგების საბოლოო პირობები ჯერ დამტკიცებული არ არის.

აშშ-ის კონგრესს დაგეგმილი გარიგების შესახებ არაოფიციალურად უკვე აცნობეს. პაკეტის საფასურის დიდი ნაწილი უცხოური სამხედრო დაფინანსების პროგრამით დაიფარება, რომლის ფარგლებშიც აშშ ისრაელს თანხებს გადასცემს, რათა ქვეყანამ ეს თანხა შეერთებული შტატებისგან იარაღის შესაძენად გამოიყენოს.

დაგეგმილი გარიგება ტრამპის ადმინისტრაციის მიერ ისრაელის სამხედრო შესაძლებლობების გასაძლიერებლად გადადგმული ნაბიჯების უახლესი მაგალითია. ღაზაში მიმდინარე ომს ათიათასობით პალესტინელის სიცოცხლე ემსხვერპლა და ტერიტორია მასშტაბურად განადგურდა. აშშ-ის შუამავლობით მიღწეული ცეცხლის შეწყვეტა მყიფე აღმოჩნდა და ძალადობა კვლავ გრძელდება, წერს სააგენტო.

გარიგების შესახებ თავდაპირველად The Washington Post-მა გაავრცელა ინფორმაცია. გადაწყვეტილება იმ ფონზე მიიღეს, როდესაც ისრაელი ღაზაში მიმდინარე ომის გამო მზარდ საერთაშორისო იზოლაციას განიცდის. ომი 2023 წლის 7 ოქტომბერს დაჯგუფება „ჰამასის“ მიერ ისრაელზე განხორციელებულ თავდასხმებს მოჰყვა, რომლის დროსაც ისრაელში ბევრი ადამიანი დაიღუპა.

Associated Press-ის ცნობით, დაგეგმილი იარაღის მიყიდვა ასევე მიუთითებს, რომ პრეზიდენტ დონალდ ტრამპსა და ისრაელის პრემიერ-მინისტრ ბენიამინ ნეთანიაჰუს შორის ურთიერთობაში არსებული გარკვეული უთანხმოება აშშ-ისა და ისრაელის მჭიდრო სამხედრო-პოლიტიკურ თანამშრომლობაზე გავლენას არ ახდენს.