ზელენსკიმ CBS News-ს განუცხადა, რომ ბოლო რამდენიმე კვირაში რუსეთმა მისი თვითმფრინავის წინააღმდეგ დრონებით თავდასხმა ორჯერ სცადა

ბოლო რამდენიმე კვირაში რუსეთმა ორჯერ ამოიღო მიზანში თვითმფრინავი, რომლითაც უკრაინის პრეზიდენტი გადაადგილდებოდა - ამის შესახებ ვოლოდიმირ ზელენსკიმ CBS News-თან ექსკლუზიურ ინტერვიუში სამშაბათს განაცხადა.

„მოლდოვაში ჩემი საპრეზიდენტო თვითმფრინავი იმყოფებოდა და სწორედ ამიტომ დაესხნენ თავს მოლდოვას“, - განაცხადა ზელენსკიმ. - „როდესაც შინ ვბრუნდებოდით, ისევ კიშინიოვის გავლით, მათ იგივე გაიმეორეს“.

უკრაინის ლიდერმა CBS News-თან საუბრისას აღნიშნა, რომ რამდენიმე დღის შემდეგ, უკრაინაში მისი დაბრუნების დროს, მოლდოვის საჰაერო სივრცეში ერთმა ან ორმა დრონმაც შეაღწია - ამ ინციდენტის შესახებ აქამდე ინფორმაცია არ გავრცელებულა.